Sofıa Samodelkına Kanadadaǵy Gran-prı kezeńinde úzdik bestikke endi
ASTANA. KAZINFORM – Qazaqstandyq mánerlep syrǵanaýshy Sofıa Samodelkına Kanadanyń Keloýna qalasynda ótip jatqan Gran-prı serııasynyń ekinshi kezeńinde qysqa baǵdarlama boıynsha besinshi orynǵa turaqtady, dep habarlaıdy Ulttyq olımpıada komıteti.
Qazaqstandyq sportshy qysqa baǵdarlamadaǵy óneri úshin tóreshilerden 71,84 upaı alyp, aralyq esepte besinshi orynǵa jaıǵasty.
Jarysta japonııalyq Mao Sımada kósh bastap tur. Ol 82,11 upaı jınady. Ekinshi orynda 78,50 upaımen amerıkalyq Izabo Levıto, al úshinshi orynda 77,24 upaı jınaǵan estonııalyq Nına Petrykına keledi.
Qatysýshylar erkin baǵdarlamalaryn Astana ýaqytymen 2 qarashaǵa qaraǵan túni usynady.
Aıta keteıik, buǵan deıin Sofıa Samodelkına mánerlep syrǵanaý sportynda taǵy qansha ýaqyt óner kórsetýdi josparlap otyrǵanyn aıtqan edi.
