Sofıa Samodelkına AQSh-taǵy Gran-prı kezeńinde besinshi oryn aldy
ASTANA. KAZINFORM — AQSh-tyń Everett qalasynda mánerlep syrǵanaýdan Gran-prı serııasynyń kezekti kezeńi máresine jetti.
Áıelder arasyndaǵy jekeleı synda Qazaqstan atynan synǵa túsken Sofıa Samodelkına eki baǵdarlama qorytyndysy boıynsha besinshi orynǵa ıe boldy.
Qysqa baǵdarlamadan keıin otandasymyz 61,03 upaı jınap, 11-orynǵa jaıǵasqan edi.
Erkin baǵdarlamada Sofıa 137,56 upaı enshilep, tórtinshi oryn aldy. Osylaısha, qos baǵdarlama qorytyndysynda 198,59 upaı jınaǵan qazaqstandyq sportshy birden alty satyǵa kóterilip, jarysty besinshi orynmen aıaqtady.
236,81 upaı jınaǵan japonııalyq Amı Nakaı jeńimpaz atandy. Ekinshi oryndy beıtarap mártebede óner kórsetken reseılik Aleksandra Ignatova (213,90) ıelendi. Al úzdik úshtikti taǵy bir japonııalyq Rıno Matsýıke (211,63) túıindedi.
Aıta keteıik, qazaq dzıýdoshylary Zagrebte ótip jatqan Gran-prı týrnıriniń alǵashqy kúni bir altyn men eki kúmis medal jeńip aldy.