Sofıa Berýltseva Qazaqstan qorjynyna Azıadanyń tórtinshi altynyn saldy
ASTANA. KAZINFORM – Qazaqstan ulttyq quramasynyń ókili Sofıa Berýltseva Aıtı–Nagoıada ótip jatqan XX jazǵy Azııa oıyndarynda karateden chempıon atandy, dep habarlaıdy Týrızm jáne sport mınıstrligi.
Qazaqstandyq sportshy kýmıte baǵdarlamasy boıynsha 68 keliden joǵary salmaq dárejesinde jeńiske jetip, el quramasyna tórtinshi altyn medaldi syılady.
Bul – Sofıa Berýltsevanyń Azııa oıyndaryndaǵy qatarynan ekinshi altyn júldesi. Buǵan deıin Hanchjoýda ótken Azııa oıyndarynda da ol 68 keliden joǵary salmaq dárejesinde chempıon atanǵan.
– Sofıa Berýltsevanyń jeńisi ulttyq quramany júıeli daıarlaý men Qazaqstanda karate sportyn damytý jumystarynyń taǵy bir nátıjesi boldy, – delingen málimette.
Sofıa Berýltseva Tokıo Olımpıadasynyń qola júldegeri jáne karateden Qazaqstan ulttyq quramasynyń jetekshi sportshylarynyń biri.
Qazirgi tańda WKF karate elimizdiń 20 óńirinde damytylyp keledi. Sporttyń bul túrimen 77 myńnan astam adam aınalysady. Sportshylardy daıarlaýǵa 600-ge jýyq jattyqtyrýshy tartylǵan, onyń ishinde 140 maman aýyldyq jerlerde jumys isteıdi.
Búgin qazaqstandyq karateshi Jolaman Bıǵabyl da Azııa oıyndarynyń chempıony atandy. Buǵan deıin tasjoldaǵy velosporttan Rınata Sultanova men Alekseı Lýtsenko altyn medal jeńip alǵan.
Al trıatlonshy Arlan Jańabaı men qazirgi bessaıystan Qazaqstan erler quramasy qola júldege ıe boldy.
