Sofıa Berýltseva karateden álem chempıonatynda kúmis aldy
ASTANA. KAZINFORM — Tokıo Olımpıadasynyń qola júldegeri, Dúnıejúzilik oıyndar, Azııa oıyndary men sary qurlyq chempıonatynyń jeńimpazy Sofıa Berýltseva Kaırdegi (Mysyr) karateden álem birinshiliginiń fınalynda óner kórsetti.
Qazaqstandyq karateshi 68 keliden joǵary salmaqta fınalda germanııalyq Iohanna Knermen altyn júldeni sarapqa saldy.
Báseke barysynda germanııalyq sportshy 5:0 esebimen alǵa ketti. Sodan keıin aıqyn basymdyqpen jeńiske jetti – 8:0. Osylaısha, S.Berýltseva sporttyq jolynda alǵash ret álem chempıonatynyń kúmis júldesine qol jetkizdi.
Álemdik dodada taǵy bir qazaqstandyq Dıdar Ámiráli 67 kelige deıingi salmaqta qola júlde úshin aıqasta chılılik Freıre Fýentes Tomasty jeńdi.
Dıdar osymen eki dúrkin álem chempıonatynyń júldegeri atanyp otyr. Buǵan deıin ol 2023 jyly da qola júldege ıe bolǵan edi.
Sondaı-aq Ásel Qanaı 61 kelige deıingi salmaqta úzdik úshtikke ilikti. Ásel ýkraınalyq Oleksandra Sholohovadan 3:2 esebimen basym túsip, qola júldeni jeńip aldy.
Budan buryn qazaqstandyqtardan Móldir Jańbyrbaı 2023 jyly álem chempıonatynda altynnan alqa taqqan edi.
Eske sala keteıik, budan buryn Sofıa Berýltsevanyń karateden álem chempıonatynyń fınalyna shyqqanyn jazǵan bolatynbyz.