Sofreh Capital negizin qalaýshy elimizde kompanııa keńselerin ashpaq
ASTANA. KAZINFORM — Amerıkalyq ınvestor eldiń ınjenerlik áleýetin atap ótip, Qazaqstannyń AI ekonomıkasyn damytýǵa ınvestıtsııa salýǵa daıyn ekenin málimdedi.
Sofreh Capital kompanııasynyń negizin qalaýshy ári bas dırektory Shervın Pıshevar Qazaqstanda kompanııa keńselerin ashyp, komandasynyń bir bóligin elge kóshirý jáne Qazaqstannyń bolashaǵyna ınvestıtsııa sala bastaý nıetin bildirdi. Bul týraly ol Astanada ótip jatqan halyqaralyq AI & Digital Bridge 2026 forýmy aıasyndaǵy THE NEW ECONOMY: POWERED BY AI sessııasynda aıtty.
Qazaqstanda jasandy ıntellektini damytý perspektıvalary týraly sóz qozǵaǵan Shervın Pıshevar eldegi ınjenerlik kadrlardyń, ınnovatsııalardy memlekettik qoldaýdyń jáne resýrstyq bazanyń úılesimin atap ótti.
— Sizderde bólisýge bolatyn naqty keıster men mysaldar bar. Mysaly, Higgsfield-ti alaıyq. Bul Qazaqstandy aldyńǵy qatarǵa shyǵaryp, qazaqstandyqtardyń ınjenerlik áleýetin kórsetken mysal. Mıllıardtaǵan dollar kólemindegi kórsetkishterdiń ózi sizderde zor ınjenerlik áleýet bar ekenin ańǵartady. Muny maqtan tutý kerek, — dedi ol.
Investordyń aıtýynsha, Qazaqstanda AI ekonomıkasyn damytýǵa yqpal etetin birqatar faktor bar.
— Sizderde talanttar, ınjenerlik kadrlar, ınnovatsııalar men jańashyldyqty qoldaıtyn memleket, sondaı-aq AI ekonomıkasyn damytýǵa qajetti resýrstar bar. Sizderde ǵarysh ónerkásibine qajetti mıneraldardyń barlyǵy bar, spýtnıkter, atom ınfraqurylymy, Higgsfield bar. Sondyqtan men Qazaqstanda keńseler ashyp, kompanııany osynda kóshirip, eldiń bolashaǵyna ınvestıtsııa sala bastaǵym keledi, — dedi Shervın Pıshevar.
Ol sondaı-aq tehnologııalyq ekojúıeniń qalyptasýyn Kremnıı alqabynyń damýymen salystyryp, ýaqyt óte kele onyń artyqshylyqtary kóbine materıaldyq emes sıpatqa ıe bolyp, jınaqtalǵan bilim men quzyretterge baılanysty qalyptasqanyn atap ótti.
Bul málimdeme Qazaqstannyń AI ınfraqurylymyn damytý máseleleri talqylanyp jatqan tusta aıtyldy. Premer-mınıstrdiń orynbasary — jasandy ıntellekt jáne tsıfrlyq damý mınıstri Jaslan Mádıev Qazaqstan AI ekonomıkasynyń energetıkalyq jáne chıptik ınfraqurylymnan bastap, ózderiniń tildik modelderi men qoldanbaly sheshimderine deıingi barlyq bes deńgeıin júıeli túrde damytýdy kózdep otyrǵanyn aıtty.
Al «Qazaqtelekom» AQ basqarma tóraǵasy Baǵdat Mýsın esepteý qýattaryn eksporttaý múmkindigi bar ekenin atap ótti. Onyń aıtýynsha, data-ortalyqtardy damytý jáne tehnologııalyq kompanııalarmen áriptestik Qazaqstanda AI ekonomıkasynyń jańa baǵytyn qalyptastyrýǵa múmkindik beredi.
