Sofııada kezekten tys saılaýdy ádil ótkizýdi talap etken narazylyq sherýi ótti

ASTANA. KAZINFORM – Bolgarııa astanasy Sofııa qalasynda kezekten tys parlamenttik saılaýdy ádil ári ashyq ótkizýdi talap etken jappaı narazylyq sherýi ótti. Bul týraly TASS agenttigi habarlaıdy.

«Ádil jáne ádiletti saılaý úshin, daýys berý nátıjelerin arnaıy mashınalar arqyly 100 paıyz sanaýdy talap etemiz» degen uranmen ótken aktsııaǵa myńdaǵan adam qatysqan. Narazylyq saldarynan qala ortalyǵyndaǵy kólik qozǵalysy tolyqtaı toqtatyldy.

Sherýdi uıymdastyrýshylar – oppozıtsııalyq partııalardyń ókilderi. Olar parlamenttegi kópshilik usynǵan saılaý kodeksine ózgerister engizý jáne daýystardy sanaý úshin jańa skanerlerdi mindetti túrde qoldaný týraly bastamaǵa qarsy shyqty.

Oppozıtsııa ókilderiniń pikirinshe, saılaýǵa shamamen eki aı ǵana qalǵan jaǵdaıda jańa tehnıkany satyp alyp, baptap, lıtsenzııalaýǵa úlgerý múmkin emes. Bul óz kezeginde qaǵaz bıýlletenderge qaıta oralýǵa alyp kelip, saılaý nátıjelerin burmalaýǵa jol ashýy múmkin.

Qazirgi tańda Bolgarııada jeltoqsan aıynda úkimet otstavkaǵa ketkennen keıin konstıtýtsııalyq rásimder jalǵasyp jatyr. Bul rásimder 51-shaqyrylymdaǵy parlament depýtattaryna jańa úkimet qurýǵa múmkindik beredi. Alaıda jetekshi eki saıası birlestik bul quqyqtan bas tartqan.

Aldaǵy kúnderi el prezıdenti parlamenttegi qalǵan jeti fraktsııanyń birine úshinshi mandatty tapsyrady. Eger ol da iske aspasa, bul eń yqtımal stsenarıı retinde qarastyrylyp otyr, onda memleket basshysy tehnıkalyq premer-mınıstr men ýaqytsha úkimetti taǵaıyndaıdy. Mundaı úkimet eki aı ishinde elde kezekten tys parlamenttik saılaýdy daıyndap, ótkizýge mindetti bolady.