Sofııa Berýltseva: Japonııaǵa júldesiz qaıtpaımyn degen senimmen keldim
NAGOıA. KAZINFORM – Qazaqstandyq karateshi Sofııa Berýltseva kásipqoı mansabynda jazǵy Azııa oıyndarynyń eki dúrkin chempıony atanyp, Japonııadaǵy Azıadada kezekti iri jetistigin tirkedi. Jarystan keıin sportshy Kazinform tilshisine týrnırge daıyndyǵy, chempıondyq ataqty qorǵaý kezindegi psıhologııalyq qysym jáne Japonııanyń ózi úshin erekshe mańyzy týraly aıtyp berdi.
Sportshynyń aıtýynsha, buǵan deıin Azııa chempıony atanǵanyn oılaý jarys kezinde artyq qysym týdyrýy múmkin. Sondyqtan ol bul joly ózin qaıtadan «nólden» bastaǵandaı sezinip, jarysqa alǵashqy Azııa oıyndaryna qatysqandaı daıyndalǵan.
– Shyn máninde, meniń ustanymym osyndaı: eger sen Azııa chempıony atanǵan bolsań, kelesi jyly ózińdi qaıtadan «nólge» túsirýiń kerek. « Men buǵan deıin chempıon boldym» degen oılardy basyńda ustap, ózińe óziń qysym jasaısyń. Sondyqtan bárin qaıta bastaý kerek.
Bul seniń alǵashqy Azııa oıyndaryń sekildi bolýy tıis. Árıne, buryn qatysqan soń biraz jeńildeý. Atmosferany bilesiń, ózińdi qalaı sabyrǵa keltirý kerektigin túsinesiń, jekpe-jekter men jarys kezeńderiniń qalaı ótetinin bilesiń,- dedi ol.
Sonymen qatar, Sofııa Japonııaǵa ár qashan jaqsy úmitpen keletinin aıtty.
– Japonııaǵa kelgen saıyn bárin jyly sezimmen eske alamyn. Olımpıada oıyndary oıǵa oralady. Ókinishke qaraı, bizdiń sport túrimiz ázirge Olımpıada baǵdarlamasyna qaıta engen joq. Biraq Japonııaǵa kelgende bárin jaqsy kóńilmen eske alyp, osy jerden medalsyz qaıtpaımyn degen úmitpen kelemin,- dedi sportshy.
Qazaqstandyq karateshi búgingi qarsylastaryn baǵalady.
– Toptyq kezeń qıyn boldy. Jerebe nátıjesin kórgende-aq ońaı bolmaıtynyn túsindim. Saýd Arabııasynan kelgen qyz – jastar arasyndaǵy Azııa chempıony. Al Nepal sportshysymen ótken Azııa oıyndarynda jáne lıga fınalynda kezdeskenbiz. Alǵashqy jekpe-jektiń ózinde múmkindigimdi tolyq kórsettim, sondyqtan odan keıingi jekpe-jek jeńilirek ótti,- dedi Sofııa.
Osyǵan deıin habarlaǵanymyzdaı, Jolaman Bıǵabyl karateden Azııa oıyndarynyń chempıony atandy.
Sonymen qatar, karateshi Sofıa Berýltseva Qazaqstan qorjynyna Azıadanyń tórtinshi altynyn saldy.
