Sodyrlar Pákistannyń ońtústik-batysynda 20 adamdy óltirdi
ASTANA. QazAqparat - Belgisiz sodyrlar ótken túnde pákistandyq Týrbat qalasyndaǵy jumysshylar lagerine oq jaýdyrǵan. Saldarynan kem degende 20 adam qaza tapty, taǵy úsheýi jaraqattandy, dep habarlady sheteldik BAQ.
Olardyń aqparatynsha, Sohrab dambasyndaǵy kópirdiń qurylysyna jumyldyrylǵan kórshiles Sınd jáne Pendjab provıntsııalarynyń jumysshylaryna shabýyl jasalǵan. Shabýyl jasaǵandar mototsıklderdiń kómegimen oqıǵa ornynan izin sýytqany atalyp ótildi.
Polıtsııa bolǵan oqıǵanyn sebepterin anyqtap jatyr. Ázirge bul isti Belýdjıstandaǵy birde-bir lańkestik top óz moınyna almady.
