Sodyrlar qatań qylmystyq jaýapqa tartylady dep ýáde beremin – Prezıdent

NUR-SULTAN. QazAqparat – QR Prezıdenti Qasym-Jomart Toqaev halyqqa úndeýi kezinde sodyrlar men lańkesterdi izdeý jáne olardy ustaý úshin arnaıy vedomstvoaralyq top qurylǵanyn aıtty, dep habarlaıdy QazAqparat tilshisi.

«Men qurǵan vedomstvoaralyq top sodyrlar men lańkesterdi izdeýmen jáne olardy ustaýmen aınalysady. Olardyń bári qatań qylmystyq jaýapkershilikke tartylady dep azamattarymyzǵa ýáde beremin.

Barsha qazaqstandyqtan ótinerim, saqtyq tanytyp, barynsha qyraǵy bolyńyzdar. Kúmándi adamdardyń qandaı da bir kúdik týdyratyn belsendi áreketin baıqasańyz, quqyq qorǵaý organdary men jedel jelilerge habarlańyzdar.

Quqyq qorǵaý organdary men armııanyń is-qımylyna, sondaı-aq olardyń vedomstvoaralyq úılesimine qatysty anyqtaıtyn másele kóp.

Arnaýly jasaqtyń, arnaýly qural-jabdyqtardyń jetispeıtini belgili boldy. Osy máselelerdi shuǵyl túrde sheshýimiz kerek», - dedi Qasym-Jomart Toqaev úndeýinde.

Memleket basshysynyń aıtýynsha, eldegi tártipsizdik kezinde jalǵan aqparat taratý jaǵdaıdy ýshyqtyra tústi.

«Sodyrlardyń terrakt jasaý týraly jymysqy jospary men jasyryn daıyndyǵyn memleket qalaısha bilmeı qalǵanyn anyqtap, túsiný asa mańyzdy. Tek Almatynyń ózine 20 myń sodyr shabýyl jasady.

Barlyq oblysta áskerı, ákimshilik jáne áleýmettik nysandarǵa uıymdasqan túrde, joǵary jaýyngerlik daıyndyqpen jáne asqan qatigezdikpen shabýyl jasaý áreketi olardyń naqty josparynyń bolǵanyn kórsetti.

Sodyrlardan bólek, ıdeologııalyq dıversııa jasaýǵa ábden jattyqqan, jalǵan aqparattar men «feıkter» taratýdy sheber meńgergen jáne adamdardyń kóńil-kúıine yqpal ete alatyn mamandar jumys istegen.

Olardy daıyndaýmen jáne basqarýmen birtutas komandalyq pýnkt aınalysqanǵa uqsaıdy. Bul máselemen UQK men Bas prokýratýra aınalysyp jatyr», - deıdi ol.