«Sotsıalıstik Qazaqstan» 1945 j. 11 sáýir: «Kózge túsken bólimsheler men quramalarǵa «Kenıgsberg» ataýyn berý tapsyryldy»
«Qazaq SSR-ynyń 25 jyldyǵy atyndaǵy sotsıalıstik jarysty keń óristete otyryp, kóktemgi egiske barlyq jaǵynan tolyq ázirlikpen kiriseıik. Ony qysqa merzimde, joǵary agrotehnıkalyq dárejede, úlgili ótkizeıik». «Sotsıalıstik Qazaqstan» gazetiniń 1945 jylǵy 11 sáýirdegi sany osyndaı uranmen shyqty.
Gazettiń bas maqalalarynyń biri - «Egin ári tez, ári sapaly egilsin!» dep atalady.
Bul sózder sol jyly kóktemde búkilodaqtyq uranǵa aınalǵan. Onda: «Orta Azııa men Zakavkazenyn, Kýban men Donnyń. Ýkraınanyń, Volga jaǵalaýynyń jáne elimizdiń basqa kóptegen óńirleriniń egis dalasynda traktorlardyń motorlary dúrildeı bastady. Sovet eginshileri týǵan jerge mol ónim berý úshin qosqa shyqty» - degen joldar bar. Onda aldyńǵy qatarly jáne artta qalyp qoıǵan óńirler de aıtylady. Maqala jurtshylyqty jeńis jyly jaqsy jumys isteýge shaqyrady.
Sonymen qatar, Joǵarǵy Bas qolbasshy Iosıf Stalınniń Z-Belorýs maıdany áskerleriniń qolbasshysy, Keńes Odaǵynyń marshaly Vasılevskııge jáne Maıdan shtabynyń bastyǵy, general-polkovnık Pokrovskııge bergen buıryǵy jazylǵan.
«3-shi Belorýs maıdanynyń áskerleri kóshelerdegi qatty urystardan keıin, nemisterdiń Kenıgsbergtegi ásker tobyn talqandaýdy aıaqtap, búgin, 9 áprelde, Shyǵys Prýssııanyń qamaly jáne bas qalasy, nemisterdiń Baltyq teńizi boıyndaǵy bekinisti toraby - Kenıgsbergti shabýylmen aldy. Bir kúngi urystarda saǵat 20-ǵa deıin, maıdannyń áskerleri nemisterdiń 27000-nan asa soldaty men ofıtserin, sol sııaqty, jaýdan kóp qarý-jaraq jáne ár túrli soǵys múlkin túsirdi. Kenıgsberg garnızonynyń qaldyqtary, qamal komendanty, jaıaý esker generaly LıASh-pen jáne onyń shtabymeıa birge búgin, 21 saǵat 30 mınýtta, qarsylasýdy toqtatyp,qarýlaryn tapsyrdy» - dep bastalady.
Budan ári kózge túsken qolbasshylardyń aty-jónderi aıtylyp, olardy marapattaý, al kózge túsken bólimsheler men quramalarǵa «Kenıgsberg» ataýyn berý tapsyrylyp, 9 sáýirde 24 saǵatta Máskeýde 3 Belorýs maıdan áskerleriniń qurmetine salıýt berilgendigi jáne otan atynan alǵys bildirilgeni aıtylǵan.
Buǵan qosa, gazette 9 sáýir kúni 86 jasyna qaraǵan shaǵynda qaıtys bolǵan halyq aqyny Nurpeıis Baıǵanınge baılanysty nekrolog jarııalanǵan.
«Hat tanýǵa jaǵdaıy múmkindik bermegen Nurpeıis irgeli aqyndardyń aýzynan estigen «Qoblandy», «Er Tarǵyn», «Alpamys» sııaqty qazaq halqynyń ótkendegi batyrlyǵyn beıneleıtin dastan-jyrlardy kórkemdeı, molaıta jyrlady. Nurpeıis ózinen burynǵy jyrlarmen ǵana qanaǵattanbaı, elden estigen, kórgen okıǵalardan «Aq-Kenje», «Narǵyz», «Qyrymnyń qyryq batyry» sııaqty kólemi zor, kórkemdigi tamasha poemalar shyǵardy. Bul poemalarda ol revolıýtsııadan burynǵy aýyldaǵy baılar men feodaldardyń eńbekshi halyqty qanaýyn, áıel namysyn taptaǵanyn ótkir tilmen sókti, bas bostandyǵyn kóksedi» - degen sózder bar.
***
Gazettiń kóshirmeleri QR Mádenıet jáne sport mınıstrliginiń «Qujattaný jáne muraǵat isi jónindegi ǵylymı-tehnıkalyq aqparat ortalyǵy» RMM-nen alyndy. Ortalyq dırektory Alqııa Rahymbaevaǵa alǵys bildiremiz.
