Sotsıalıstik Eńbek Eriniń urpaqtary Ózbekstandaǵy bıýstti Qazaqstanǵa jetkizýge kómek surady
AQTÓBE. QazAqparat -Sotsıalıstik Eńbek Eri Jabaı Balımanovtyń urpaqtary Ózbekstan elindegi bıýstti Qazaqstanǵa ákelýge kómek surady. Sebebi, bıýst urlanyp, keıin aýyl shetindegi saıdan tabylǵan. Qazir týystarynyń as úıinde tur, dep habarlaıdy QazAqparat tilshisi.
Eki márte Sotsıalıstik Eńbek Eri atanǵan qazaqstandyq Jabaı Balımanov Aqtóbeniń Temir aýdanynda 1893 dúnıege kelgen. Ol 27 jasynda Tashkent qalasyna baryp, qonystandy. Urpaqtarynyń aıtýynsha, eńbek eri óziniń qonys aýdarý sebebin eshkimge aıtpaǵan ári týǵan jerin ańsap ótken. Shyn aty -Qaıyrjan. Úsh ul, bir qyz tárbıeledi. Jabaı Balımanovtyń urpaqtary Ózbekstanda 2018 jylǵa deıin turyp, keıin bári Qazaqstanǵa qonys aýdardy.
Jabaı Balımanovtyń bıýsti de sol kezde joǵalǵan.
«Ózbekstandaǵy biz turǵan aýylda atamyzdyń bıýsti boldy. Ótken jyly onyń joǵalyp ketkenin estip, izdep barǵan edik. Joǵalyp ketken soń ony aýyldaǵy mektep muǵalimi saıdan taýyp alǵan. Keıin qudamyzdyń as úıine aparyp qoıǵan. Qazir de sol jerde tur. Polıtsııa qylmystyq is te qozǵamapty. Aýyl ákimshiligi aldaǵy ýaqytta bıýsttiń tuǵyryn qaıta qalap, bıýstti ornyna qoıamyz dep ýáde berdi. Biraq biz ony Qazaqstanǵa, Aqtóbeniń Temir aýdanyna ákelgimiz keledi. Biz Ózbekstan prezıdentine bıýstti bizge berýge ótinish berdik. Qazaqstan Úkimetine de portal arqyly hat jazyldy», - dedi Jabaı Balımanovtyń kelini Aqzáýre Dáribaeva.
Aıta keteıik, Jabaı Balımanov qarakól qoıyn ósirip, 1951,1958 jyldary Sotsıalıstik Eńbek Eri ataǵyn aldy. Ózbek SSR-niń Joǵarǵy keńesiniń tórtinshi, besinshi shaqyrylymdarynyń depýtaty, úsh márte «Lenın», Eńbek Qyzyl Tý ordenderimen marapattaldy. Sonymen qatar, joǵary aýyl sharýashylyǵy kórmesine qatysyp, alty medal aldy. Onyń úsheýi altyn. Ári Tashkent pen Buharada kóshe ataýlary, ózi eńbek etken Aqtaý aýylynda mektepke esimi berildi.
