Sotsıalıstik Eńbek Eri Nurbaqyt Qabdykárimova ómirden ozdy
QARAǴANDY. QazAqparat – Qaraǵandy oblysynda Sotsıalıstik Eńbek Eri Nurbaqyt Qabdykárimova 17 sáýirde 72 jasqa qaraǵan shaǵynda ómirden ótti, dep habarlaıdy QazAqparat.
Nurbaqyt Qabdykárimova ótken ǵasyrdyń 60-70 jyldarynda apasy Kámshat Dónenbaevadan keıin qazaq qyzdaryna tehnıka tizgindeýge úndeý tastap, qarshadaıynan eńbekke aralasqan Qarqaralynyń qaısar qyzy.
Ol 1948 jyly 3 qarashada Qarqaraly aýdany, qazirgi Martbek Mamyraev atyndaǵy aýylda dúnıege kelgen. Eńbek jolyn 1966 jyly týǵan aýylynda qarapaıym jumysker bolyp bastady. Shopannyń kómekshisi, keıin mehanızatorlar kýrsyn bitirip, tehnıka tizginin ustaǵan. Jastaıynan «MTZ», «T-4» traktorlaryn taqymdaǵan eńbekqor qyz «K-700» alyp traktoryna da alǵashqylardyń biri bolyp bas bildirgen.
Adal eńbegimen ómirlik baqytyn eselegen maıtalman 1972 jyly Lenın ordenimen marapattaldy. BLKJO-nyń, Qazaqstan LKJO-nyń birneshe sezine delegat bolyp qatysyp, birneshe ret aýdandyq, oblystyq keńestiń, al 1975 jyly QazKSR Joǵarǵy Keńesiniń depýtaty bolyp saılandy. Aýyl sharýashylyǵy salasyndaǵy uzaq jylǵy eńbegi 1982 jyly memleket tarapynan joǵary baǵalanyp, Sotsıalıstik Eńbek Eri atandy. Omyraýynda ekinshi Lenın ordeni men «Oraq pen Balǵa» Altyn Juldyzy jarqyraǵan batyr qyz Táýelsizdik jyldarynda da talaı jastarǵa tálimger bolyp, jas Qazaqstan memleketiniń órkendeýine ózindik úlesin qosty.
«Qarqaralynyń Kámshaty», «Darhan dalanyń Darabozy» atanǵan Nurbaqyt Qabdykárimqyzynyń qazasyn barsha qaraǵandylyqtar qabyrǵasy qaıysa qabyldap, oblys ákimi Jeńis Qasymbek marqumnyń otbasyna, týǵan-týystaryna kóńil aıtty.
«Ol zeınet demalysyna shyqqansha aýyr eńbekten qol úzgen joq. Óz esimine saı, ómirdiń nuryn da, baqytyn da adal eńbekten tapty. Eńbegimen er atandy. Nurbaqyt Qabdykárimovanyń ónegeli ómir joly - jas urpaqqa úlgi. Onyń jarqyn beınesi bizdiń júregimizde máńgi saqtalady», - delingen oblys ákiminiń kóńil aıtý hatynda.
Foto: ortalyq.kz
