Sochıdiń 26 joldamasy qanjyǵada, meje - 40
ASTANA. 21 naýryz. QazAqparat - Qazaqstan 2014 jyly aqpan aıynda Sochı qalasynda ótetin qysqy olımpıada oıyndaryna 26 joldama alyp úlgerdi.
Al sport jáne dene shynyqtyrý isteri agenttigi 40 joldama alýdan úmitti, dep habarlaıdy «Alaman».
Reseıdiń Sochı qalasynda ótetin qysqy olımpıadaǵa joldama utyp alý jarystary 2012 jyldyń qarasha aıynan bastalǵan edi.
Qazaqstan alǵashqy lıtsenzııany 2012 jyly qazanda shańǵymen tuǵyrdan sekirý sporty boıynsha jeńip aldy.
ON ShAŃǴYShY MEN EKІ MÁNERLEP SYRǴANAÝShY
Al jaqynda Kanadada mánerlep syrǵanaýdan ótken álem chempıonatynda qazaqstandyq Denıs Ten kúmis júldeger atandy.
Osy nátıjeden keıin halyqaralyq konkı federatsııasy Qazaqstanǵa eki joldama berdi. Endi Sochı olımpıadasyna Denıs Ten men Abzal Raqymǵalıev qatysady. Ten álem chempıonatyndaǵy jetistiginen keıin halyqaralyq konkı federatsııasy jarııalaǵan reıtıngte birden on jetinshi orynnan altynshy orynǵa kóterildi.
Shańǵymen júgirýden Italııanyń Val Dı Fomme qalasynda ótken álem chempıonatynda Qazaqstan sportshylary Alekseı Poltoranın men Nıkolaı Chebatko komandalyq sprıntte qola júlde alǵan edi. Keıin Poltoranın 50 shaqyrymdyq marafondyq jarysta taǵy bir qola medal ıelendi.
BIATLONNAN - ON, KONЬKIDEN - ÚSh JOLDAMA
Bıatlonnan da bıylǵy jarys maýsymy aıaqtaldy. Álem kýbogy men álem chempıonatynyń qorytyndysy boıynsha, Qazaqstan Sochıge on joldama aldy. On lıtsenzııa erler men áıelderge teń bólingen. Joldama jeke sportshylarǵa emes quramaǵa berilgendikten olımpıadaǵa qatysatyn bıatlonshylardyń esimin bapkerler keńesi jarııalaıdy.
Konkımen júgirý sportynan álem kýbogy qorytyndysy boıynsha Qazaqstan úsh lıtsenzııa utty. 1000 metrlik qashyqtyqqa júgirýden Denıs Kýzın, 5000 metrge jarysýda Dmıtrıı Babenko Sochı olımpıadasyna qatysý quqyǵyn jeńip aldy. Áıelder arasynda Ekaterına Aıdova (1000 metrge júgirý) Sochıge barady.
Qazaqstan konkı federatsııasy naýryzdyń 21-i men 24-i aralyǵynda ótetin álem chempıonaty kezinde taǵy úsh joldama alýdy josparlap otyr.
Qazir frıstaıl, snoýbord, short-trek, shańǵymen tuǵyrdan sekirý sporttarynan olımpıadaǵa joldama beretin jarystar áli ótip jatyr.
Al hokkeıden Qazaqstan erler jáne áıelder quramasy olımpıada oıyndarynyń lıtsenzııasyn ala almady. Erler quramasy irikteý jarysynyń sheshýshi oıynynda Latvııadan utylyp, joldamadan aıyryldy. Áıelder quramasy Germanııa, Qytaı, Chehııamen bir joldamaǵa talasyp, barlyq oıynda jeńilip qaldy.
Qazaqstan sport jáne dene shynyqtyrý isteri agenttigi 2014 jyly ótetin Sochı olımpıadasyna barlyǵy 40 joldama alýdy josparlap otyr.
2010 jyly Vankýverde ótken qysqy olımpıada oıyndaryna Qazaqstan atynan 39 sportshy qatysyp, bıatlonshy Elena Hrýstaleva ǵana kúmis medal alǵan edi.
