Sochıdegi «Roza Hýtor» shıpajaıyndaǵy qar kóshkininen 2 adam mert boldy
ASTANA. QazAqparat - Sochıdegi «Roza Hýtor» taý shańǵysy shıpajaıynda qar kóshkini oryn alyp, eki adam qaza tapty. Bul jaıynda RF TJM ońtústik óńirlik izdeý-qutqarý otrıadynan habarlady.
Qaıǵyly oqıǵaǵa kýá bolǵandardyń sózine qaraǵanda, qar kóshkini 6 shańǵyshyny basyp qalǵan. «Labırınt» trassasynyń ortańǵy ýchaskesinde qar kóshkini oryn aldy. Kólemi 80 tekshe metrdi quraıtyn qar kóshkini máskeý ýaqyty boıynsha 12.00-de júrdi», - delingen shıpajaıdyń resmı saıtynda. «Roza Hýtor» shıpajaıy aqparatyna qaraǵanda, qar kóshkini oryn alǵan kezde trassada alty adam bolǵan. Olardyń tórteýi esh zardap shekpegenimen, ekeýi qar astynda qalyp qoıdy. Qutqarý operatsııasy júrgizilgennen keıin eki áıeldiń múrdeli shyǵaryldy. Olardy qutqarýǵa talpynys jasalǵanmen, ókinishke oraı, odan esh nátıje shyqqan joq. Aıta keteıik, olımpıada jáne paralımpıada oıyndarynan keıin «Roza Hýtor» týrıster men shańǵyshylar úshin tek keshe ǵana ashylǵan bolatyn.
