Sochıdegi Oıyndar kezinde qazaqstandyqtar besjuldyzdy krýızdik laınerde turady
ASTANA. 8 qańtar. QazAqparat - QR Indýstrııa jáne jańa tehnologııalar mınıstrliginiń Týrızm ındýstrııasy komıtetinde Sochıdegi Qysqy olımpıada oıyndaryna týrısterdiń barýy máselelerin uıymdastyrý boıynsha jınalys bolyp ótti,
dep habarlaıdy vedomstvonyń baspasóz qyzmeti.
Komıtet tóraǵasy Marat Igalıev Oıyndardy ótkizý kezeńinde reseılik bılik qabyldaǵan qaýipsizdik sharalaryn qazaqstandyq týrısterdiń qatań saqtaýy jáne bizdiń azamattarymyzdy saqtandyrý máselelerine basa nazar aýdardy.
Jospar boıynsha, Qazaqstan jankúıerleri delegatsııasynda 400 adam bolady. Onda olar «Nordwegian Jade» atty besjuldyzdy krýızdik laınerde turatyn bolady. Keme 2006 jyly Germanııada sýǵa túsirilgen, 2376 jolaýshyǵa arnalǵan 1190 kaıýtasy bar. Laınerde meıramhana, haýyz, tikeleı efır stýdııasy sııaqty kóńil kóterý oryndary qarastyrylǵan.
Qazaqstandyq delegatsııanyń turatyn jerin tańdaý barysynda qaýipsizdikke basa nazar aýdaryldy. Laıner qosymsha qorǵalatyn jáne negizgi oıyndar ótetin jerlerge jaqyn jerde júredi. Eki eselengen ótkizý rejımi (aldymen termınalda, sosyn kemeniń ishinde) qoldanylady, sondaı-aq, qonaqtardyń júkterin port terrıtorııasynda avtomattandyrylǵan baqylaý júıesi bolady.
Qazaqstandyq «Complete Service» halyqaralyq týrıstik kompanııasy bizdiń elimizdegi birden bir resmı bekitilgen agent bolyp tabylady. Osy kompanııa tuńǵysh ret jankúıer tólqujatyn engizbek. Mundaı qujaty joq jankúıer Sochı qalasyna kire almaıtyn bolady. Tolyǵyraq aqparatty kompanııanyń www.complete.kz saıtynan alýǵa bolady.
