Sochıdegi Olımpıadaǵa barý qazaqstandyq jankúıerge 4000 dollarǵa túsedi
ASTANA. 12 qyrkúıek. QazAqparat - Sochıdegi Olımpıadaǵa baryp, otandyq sportshylarǵa qoldaý kórsetý úshin qarapaıym qazaqstandyqtan qansha shyǵyn shyǵatynyn Vesti.kz tilshisi eseptedi.
Mundaı demalys qazaqstandyqtarǵa 600 myń teńgege túsedi eken. Budan da az shyǵyndalýǵa bolady, alaıda ol sizdiń Sochıde qansha kún bolatynyńyzǵa baılanysty. Sport portaly oıyndardyń sońǵy jeti kúnine bılet alýǵa keńes beredi.
Samoletpen «baryp-qaıtý» shamamen 200 myń teńgege shyǵady. Basqa ýaqytta onyń baǵasy budan tómen bolar edi, biraq Olımpıada kezinde baǵalar 20-30 paıyzǵa kóteriledi. Eń qolaılysy - Máskeý arqyly 6-7 saǵatta ushyp barý.
Sochı qonaq úılerinde Oıyndar kezinde bir adamǵa arnalǵan bólme táýligine shamamen 20 myńnan 45 myń teńgege deıin kóteriledi. Ortasha baǵany esepke ala otyryp, bir apta turý úshin shamamen 200 myńǵa jýyq aqsha shyǵyndaý kerek.
Olımpıada belgisi bar sporttyq kıimmen jabdyqtaý 100-110 myń teńgege shyǵady: qysqy kýrtka - 38 myńnan 50 myń teńgege deıin, bas kıim men moıynshalma - 15myń, jyly shalbar - 15 myń, aıaq kıim 20 myń teńgeden bastalady. Qyzdar 12 myń teńgeniń shamasynda sporttyq sómkeler satyp ala alady.
Taǵy bir mańyzdy jáıt - sport jarystarynyń bıletiniń baǵasy ár túrli bolady. Eń arzandaryn 15-20 myń teńgege satyp alýǵa bolady. Esepteı kelgende, úsh nemese tórt jarysty kórgenińiz úshin taǵy shashamen 80 myń teńge jumsaısyz.
Shyǵyndardyń sońǵy bólimi tamaq, kádesyı, atrıbýtıkaǵa qatysty. Oqıǵanyń dárejesin eskere otyryp, Sochıdegi taýarlar baǵasy kóteriledi, sol sebepti «usaq» shyǵyndarǵa dep kem degende taǵy 60 myń teńgeni alyp qoıǵan jón.
Sonymen qatar, portal erterek qonaq úıden oryn alyp, áýe bıletteri men jarysqa kirý bıletterin erte qamdaýǵa keńes beredi. Sharanyń jabylý saltanatyna qatysý úshin 30 myń teńge tóleý qajet, alaıda bir eskeretini, bul sharaǵa bıletter qalmady dese de bolady.
Joǵaryda aıtylǵandardan qorytyndy shyǵarsaq, túk almaı, qur baryp, oıyndy bir apta tamashalap qaıtamyn deseńiz, 600 myń teńge jetip-artylady.
Aqpannyń 16-sy men 23-i aralyǵynda tek qazaqstandyq sportshylardy qoldap qana qoımaı, álemdik sport juldyzdarynyń ónerin tamashalaýǵa bolady. Qazaqstandyqtardan osy aralyqta shańǵyshy Alekseı Poltoranın, bıatlonshy Elena Hrýstaleva, konkıde syrǵanaýshylar Denıs Kýzın men Ekaterına Aıdova qatysady. Bul sportshylardy sarapshylar medalǵa úmiti barlar sanatyna qosyp otyr.
Shyny kerek, mundaı jaǵdaıda siz júlde úshin mánerlep syrǵanaýshylar arasynda Denıs Tenniń qalaı óner kórsetetin kóre almaısyz, dep habarlaıdy sporttyq saıt. Alaıda Denıs Ten júldeger atansa, onyń qatysýyn Gala-kontsertten kóre alasyz. Al Oıyndardyń sońǵy 23 aqpan kúni erler arasynda hokkeı týrnıriniń aqtyq syny ótedi.
Eske sala ketsek, Sochıdegi qysqy olımpıada oıyndary 2014 jyldyń 7-23 aqpan aralyǵynda ótedi.
