Sochıdegi halyqaralyq týrıstik kórmede Qazaqstan óz ulttyq pavılonyn usyndy
ASTANA. QazAqparat - Sochıde ótken «SIFT» halyqaralyq týrıstik forýmy sheńberindegi Reseı jáne jaqyn shetel týrındýstrııasynyń ókilderi úshin basty iskerlik alańdardyń biri bolyp tabylatyn «Shıpajaılar jáne Týrızm. 2018-2019 maýsymy» atty halyqaralyq týrıstik kórmesinde Qazaqstan óz ulttyq pavılonyn usyndy. Bul týraly Qazaqstan Respýblıkasynyń Reseı Federatsııasyndaǵy elshiliginiń resmı saıty habarlady.
Qazaqstandyq týrındýstrııanyń ókilderi elimizdiń týrıstik áleýetin kórsetý úshin Sochıge óte qyzyq mádenı baǵdarlamamen keldi. Sochılik kórmege qatysýdy Qazaqstan Respýblıkasy Mádenıet jáne sport mınıstrligi Qazaqstan Respýblıkasynyń Reseı Federatsııasyndaǵy Elshiliginiń qoldaýymen uıymdastyrdy.
Qazaqstandyq pavılonnyń saltanatty ashylý rásimine Sochı qalasynyń meri A.Pahomov, Krasnodar ólkesi Shıpajaılar, týrızm jáne olımpıadalyq mura mınıstri H.Konstantınıdı jáne Qazaqstan Respýblıkasynyń Reseı Federatsııasyndaǵy Krasnodar ólkesi boıynsha qurmetti konsýly V.Mohnachev qatysty.
Elimizdiń ǵajaıyp tabıǵatymen birge stend kórermenderi mádenıetimizben naqty ýaqyt tártiptemesinde tanysty, sazsyrnaı, shańqobyz jáne dabyl sııaqty ulttyq aspaptarda oınaý boıynsha master-klasstarǵa qatysty. Árıne, barlyq qonaqtar baýyrsaqtan, qazaqstandyq shokoladtan jáne ulttyq taǵamdardan dám tatty. Al «Qazaq dastarhany» master-klassyna qatysqandar qazaq ashanasynyń biregeı ónimi - qurtty daıyndaýdyń retseptimen tanysa aldy.
Hilton Astana 5 juldyzdy qonaqúıinen sertıfıkat utyp alý múmkindigi barlyq qonaqtar úshin qosymsha jaǵymdy syılyq boldy.
"Astana Konvenshn Bıýro" JShS, "Soltústik Qazaqstan boıynsha týrıstik assotsıatsııa" QU, "Áziret-Sultan" memlekettik tarıhı-mádenı qoryǵy, "Kókjaılaý-Astana" JShS kirgen komandanyń úılesimdi jumysy Reseı turǵyndaryna Qazaqstandy jaqyndata tústi, al b2b formatyndaǵy kezdesýler iskerlik áriptestermen myqty jáne jyly qatynastardy nyǵaıtýǵa múmkindik berdi.
