Sochıde tikushaq úıdiń ústine qulady, bir adam ajal qushty
ASTANA. QazAqparat - Búgin RF Sochı qalasynyń Adlersk aýdanynda jekemenshik turǵy úıdiń ústine Eurocopter-AS350 tikushaǵynyń qulaýy saldarynan bir adam qaza taýyp, taǵy altaýy zardap shekti, dep habarlaıdy QazAqparat Reseı jańalyqtar agenttigine silteme jasap.
«AS-50 tikushaǵy Tsımlıanskaıa kóshesindegi 37-úıdiń shatyryna qulady. Tikushaq jartylaı qırady, órt bolǵan joq, biraq otyn tógildi», - dep atap ótti agenttiktiń suhbattasy.
Zardap shekken bes adam úsh túrli aýrýhanaǵa jetkizildi, olardyń ekeýi - aýyr halde.
Tergeýshiler eki nusqany qarastyrýda - tehnıkalyq aqaý jáne pılottyń qateligi. Qulaǵan tikushaq «Eltsovka» jabyq aktsıonerlik qoǵamyna tıesili.
Keshke túsken aqparatqa sáıkes, atalmysh áýe apaty oqıǵasy boıynsha qylmystyq is qozǵaldy.
«RF Tergeý komıteti Ońtústik kóliktegi tergeý basqarmasynyń tergeý organdary Krasnodar ólkesiniń Adlerovsk aýdanynda Evrokopter AS-350 tikushaǵynyń qulaýy faktisi boıynsha RF QK 263-baby 2-tarmaǵyna sáıkes (qozǵalys erejesin buzý jáne abaısyzdyqta adam ólimine alyp kelgen áýe kóligin paıdalaný) qylmystyq is qozǵady», -delingen RF Tergeý komıtetiniń baspasóz qyzmeti taratqan habarlamada.
Aldyn ala málimetter boıynsha, tikushaq jolaýshylardy tasymaldap kele jatqan. Kompanııanyń oǵan tıisti ruqsaty bolǵanyn, ne bolmaǵanyn tergeý anyqtaıdy.
