Sochıde reseılikter asyq atý ulttyq oıynyn oınady
TÚRKІSTAN. QazAqparat - Reseıdiń Sochı qalasynda «SIFT / Sochı - 2018» halyqaralyq týrıstik forýmy ótýde. Atalǵan shara aıasynda «Áziret Sultan» memlekettik tarıhı-mádenı qoryq-mýzeıiniń kórmesi ashyldy, dep habarlaıdy QazAqparat tilshisi.
Kórmeni uıymdastyrýǵa QR Mádenıet jáne sport mınıstrliginiń qoldaý kórsetti. Qoja Ahmet ıAsaýıdiń muralary men Túrkistan óńirinde ornalasqan kıeli jerlerdi nasıhattaýǵa arnalǵan kórmeniń lentasyn Qazaqstan Respýblıkasynyń Reseı Federatsııasyndaǵy Elshiliginiń Krasnodar ólkesindegi Qurmetti Konsýly Vıtalıı Mohnachev qıdy. Ol álemdik jetekshi týrıstik ortalyqtar nazaryna usynylatyn jádigerlerdiń mańyzdylyǵyna toqtaldy. Kórmede týrıster úshin keseneniń ár jyldardaǵy beıneleri men Túrkistannyń kórinisteri usynylyp, taıqazan men shyraǵdan sýretteri, Qoja Ahmet ıAsaýı men taıqazannyń maketteri tanystyryldy.
Sondaı-aq ıAsaýı kesenesi men Qylýet jerasty meshiti, Shyǵys monshasy, Gaýhar ana, Ýkasha ata kesenesi men qudyǵy, Saýran qalashyǵy syndy tarıhı oryndardyń 3D týr nusqasy kózildirik arqyly kórsetildi.
Sonymen qatar, qoryq-mýzeıdiń tarıhı oryndary men mýzeı haqynda úsh tilde jaryq kórgen býklet kitapshalary men jádigerlerdiń katalog kitaptary da kórme ekspozıtsııasynan oryn aldy.
Budan bólek halyqaralyq kórmede otandyq týrıstik ortalyqtardyń uıymdastyrýymen «Qazaqstanǵa saıahat jasa» jarnamalyq mádenı baǵdarlamalary usynyldy. Elimizdiń kórikti jerlerimen birge qazaqtyń salt-dástúri, ádet-ǵurpy jáne tól óneri tanystyryldy.
Kórmege qatysýshylar Qazaqstannan barǵan delegattardyń «Qara jorǵa» bıine tánti boldy. Reseılikter tipti asyq atý ulttyq oıynyn oınap, qazaqtyń ulttyq taǵamy qurtty jasap kórdi.
