Sochı jaǵalaýynda demalýshylar evakýatsııalandy

ALTAI. KAZINFORM – Krasnodar aımaǵyna Ýkraınanyń áskerı kúshteri jasaǵan shabýyly aıasynda, Sochıde aldyn alý sharasy retinde jaǵalaýda demalýshylardy evakýatsııalaı bastady, dep jazdy Azertadj.

Interfaks agenttiginiń habarlaýynsha, bul týraly Sochı meri Andreı Proshýnın óziniń Telegram arnasyna búgin jazǵan. 

— Búgingi shabýyldarǵa baılanysty (…) Krasnodar aımaǵyna qarasty Qara teńiz akvatorııasynda ushqyshsyz qaıyqtarmen jasalǵan shabýyldarǵa oraı, Sochı qalalyq jedel shtaby aldyn alý sharasy retinde demalýshylardy plıajdardan evakýatsııalaý týraly sheshim qabyldady. Qazirgi ýaqytta kýrort aýmaǵyndaǵy jaǵdaı shtattyq dep baǵalanyp otyr, — dep jazdy Proshýnın.

Sársenbi kúni Novorossıısk qalasyn ushqyshsyz ushatyn apparattar shabýylǵa jasady. Sońǵy málimetter boıynsha, qıraǵan drondardyń bólshegi qulaýyna baılanysty jeti úı, onyń ishinde bir qonaq úı zaqymdanǵan. Sonymen qatar, 20 kólik búlingen, onyń úsheýi tolyǵymen janyp ketken.

Jańadan alynǵan málimetter boıynsha eki adam qaza taýyp, jeti adam, onyń ishinde kámeletke tolmaǵan bala jaraqat alǵan.

Qala basshysy Andreı Kravchenko tótenshe jaǵdaı jarııalap, Tehnıko-ekonomıkalyq lıtseı bazasynda ýaqytsha ornalastyrý pýnktin ashý týraly habarlady.

Sonymen qatar, Gelendjık qalasynda ushqyshsyz qaıyqtarmen shabýyl qaýpi týraly eskertý jarııalandy. Munda barlyq júzý quraldarynyń teńizge shyǵýy toqtatylyp, turǵyndarǵa plıajdar men jaǵalaýdan ketý usynyldy. Týapsın mýnıtsıpaldyq aýdanynda da ushqyshsyz qaıyqtarmen shabýyl qaýpi jarııalanǵan.

Aıta keteıik, Memleket basshysy BUU Bas Assambleıasynyń 80-shi sessııasy aıasynda Reseı men Ýkraına kelissózderine qatysty Qazaqstannyń ustanymyn bildirdi.