Sochı Olımpıadasyndaǵy nátıjeden tómen bolmaý mindeti qoıyldy - Elsııar Qanaǵatov

ALMATY. QazAqparat - Koreıaǵa attanyp bara jatqan sportshylarǵa Sochıdegi nátıjeden tómen óner kórsetpeý mindeti qoıyldy. Bul týraly búgin Qazaqstan quramasyn saltanatty túrde shyǵaryp salý rásiminde QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Elsııar Qanaǵatov aıtty, dep habarlaıdy QazAqparat tilshisi. 

Búgin Almatydaǵy AIBA Boks akademııasynda Ońtústik Koreıanyń Phenchhan qalasynda ótetin XXIII qysqy Olımpıada oıyndaryna Qazaqstan quramasyn saltanatty túrde shyǵaryp salý rásimi ótti.
 

Sharaǵa QR Mádenıet jáne sport mınıstrligi, Ulttyq Olımpıada komıtetiniń basshylyǵy, sondaı-aq shańǵy sporty, bıatlon, frıstaıl-akrobatıka men frıstaıl-mogýldan ulttyq qurama komandalary qatysty. Sport jáne dene shynyqtyrý isteri komıtetiniń tóraǵasy Elsııar Qanaǵatov búgingi tańda 9 sport túrinen 49 joldamamyz bar ekenin jetkizdi.
 

«Qazirgi ýaqytta bizde 9 sport túrinen 49 joldama bar. Bul sońǵy sheshim emes, bir-eki kúnnen keıin tolyq tizim belgili bolady. Shańǵy sport túrinen joldama qosylady degen úmitimiz bar. Bizdiń qurama komanda sońǵy jattyǵý jumystaryn júrgizip jatyr. Sportshylarymyzdyń ushý grafıgi bıletteri de daıyn. Qurama komanda aldynda tapsyrma qoıyldy. Sochıde ótken olımpıadadan nátıjemiz kem bolmaýy kerek. Frıstaıl-mogýl, shańǵy sport túrleri, konkı sport túrlerinen úmit kútetindeı jaqsy nátıjelerimiz bar», - dedi Elsııar Qanaǵatov.

 

Esterińizge sala keteıik, HHІІІ qysqy Olımpıada oıyndary 9-25 aqpan aralyǵynda Ońtústik Koreıanyń Phenchhan qalasynda ótedi.