Sochı olımpıadasynda qola alsam, men úshin iri jetistik - Denıs Ten
ASTANA. 26 naýryz. QazAqparat - Mánerlep syrǵanaýdan álem chempıonatynyń kúmis júldegeri Denıs Ten búgin Almatyda jýrnalıstermen kezdesip, arnaıy baspasóz máslıhatyn ótkizdi,
dep habarlaıdy «Alaman».
Denıs Ten bıylǵy jyl ońaı bolmaǵanyn, mamyr aıynan bastap, jattyǵýyn qaıta bastaıtynyn aıtty.
- Gran-prı jarystarynda júlde ala almadym. Ári menen bıylǵy álem chempıonatynda eshkim júlde kútpedi. Biraq bapkerim Frenk Keroll ekeýmiz bıylǵy álem birinshiliginde bar múmkindigimizdi kórsetý úshin jumys istedik. Nátıje bar. Al jalpy, halyqtyń arasynda «Denıs Ten Reseı azamattyǵyn alady eken» degen sóz tarapty. Bul sóz - ótirik. Maǵan Reseı jaǵy resmı túrde azamattyq usynǵan da joq, - dedi mánerlep syrǵanaýshy.
Ten amerıkalyq jýrnalıst Monıka Frıdlenderdiń hatyna baılanysty óz oıyn bildirdi.
- Kúmis medal - Qazaqstan úshin úlken jetistik. Men jyldar boıy álemdi, tóreshilerdi moıyndatý úshin jumys istedim. Al bul jaǵdaıǵa (amerıkalyq jýrnalıstiń jazǵan hatyna - red) men eshteńe aıta almaımyn. Men kúmis júldege laıyq boldym. Bul - úlken jetistik. Altyn alsam, ol kezdeısoq jeńis bolar edi. Eger amerıkalyq jýrnalıstiń hatyn eskerip, maǵan altyn medal berip jatsa, bas tartpaımyn. Kúmis medal Sochıde ótetin olımpıadaǵa kúsh beredi, úmit syılaıdy. Eger keler jyly olımpıadada qola medal alsam, ol men úshin iri jetistik bolady, - dedi Denıs Ten.
Denıs Ten - Qazaqstannyń jeti dúrkin chempıony, 2011 jyly Astana men Almatyda ótken Azııa oıyndarynyń jeńimpazy. Ol el birinshiligi júldesin alǵash ret 15 jasynda utyp alǵan. Sportshy qazir AQSh-tyń Los-Anjeles qalasynda amerıkalyq Frenk Keroll (jattyqtyrýshy) men Lorı Nıkoldyń (horeograf) qaramaǵynda jattyǵady.
