Sochı-2014 Olımpıadasyna qazaqstandyq sportshylardy sheteldik jattyqtyrýshylar daıyndaýda - E.Qanaǵatov
ASTANA. 7 mamyr. QazAqparat - Qazaqstandyq sportshylardy Sochıde ótetin Qysqy Olımpıadaǵa daıyndaý úshin sheteldik jattyqtyrýshylar tartylady,
dep habarlady Sport jáne dene shynyqtyrý isteri jónindegi agenttik tóraǵasynyń orynbasary Elsııar Qanaǵatov Primeminister.kz saıtyna bergen suhbatynda.
«Biz konkı tebý sportyndaǵy, mánerlep syrǵanaýdaǵy, shańǵy jarysyndaǵy, short-trektegi, frıstaıldaǵy jáne bıatlondaǵy sheteldik jattyqtyrýshylar men mamandardy jumyldyrdyq», - dedi E.Qanaǵatov.
Sonymen qatar, ol sheteldik mamandardy tartý jattyqtyrýshylarǵa da, sportshylarǵa da paıda ákeletinin atap ótti. «Sheteldik jattyqtyrýshylardy tartý óz nátıjesin beredi. Óz jattyqtyrýshylarymyzǵa úıretý úshin olardy tartýymyz qajet. Bul álemdik tájirıbe. Barlyq elder sheteldik jattyqtyrýshylardy, sonymen birge servısmenderdi, dárigerlerdi, psıhologtardy tartady», - dep tolyqtyrdy agenttik basshysynyń orynbasary.
Qazirgi ýaqytta Qazaqstannyń Ulttyq olımpıadalyq quramasy 2014 jylǵy Sochı Olımpıadasyna 6 sport túri boıynsha 22 lıtsenzııa jeńip aldy.
Sport jáne dene shynyqtyrý isteri jónindegi agenttiktiń boljamyna súıensek, Qazaqstan jyldyń sońyna deıin 10 sport túri boıynsha 40-tan astam lıtsenzııaǵa ıe bolady.
Sochı qalasyndaǵy (Reseı) XXVII Qysqy Olımpıada oıyndary 2014 jyldyń 7-23 aqpan kúnderi aralyǵynda ótetini málim. Jarys barysynda 15 sport túri boıynsha 98 medal jıyntyǵy oınatylady. Lıtsenzııalyq jarys 2014 jyldyń qańtaryna deıin jalǵasady.
