«Sochı-2014» Olımpıadasyna baratyn Qazaqstan ulttyq quramasynyń sporttyq kıim úlgisine baıqaý jarııalandy

«Bul baıqaý alǵash ret uıymdastyrylyp otyr. Árbir memleket 4 jylda bir ótetin olımpıadalyq oıyndarǵa arnaıy daıyndyqpen barady. Sonyń ishinde dúnıejúzi tamashalaıtyn ashylý saltanatyndaǵy paradtyq kıimderge de erekshe kóńil bóledi. Sporttyq kıim jaıly túrli pikirler aıtyldy. Keıbirin maqtady, ekinshi biri synǵa túsip jatty. Sondyqtan osy joly agenttik kıim úlgilerin durystap daıyndaý maqsatynda atalǵan baıqaýdy jarııalaýǵa sheshim qabyldady», - dedi QR Sport jáne dene shynyqtyrý isteri agenttigi basshysynyń orynbasary Elsııar Qanaǵatov búgin ótkizilgen baspasóz máslıhatynda.

Aıta ketken jón, dızaınerlerdiń eń úzdik jumystaryn halyq tańdaıtyn bolady. Búgin bastalǵan baıqaý barysynda arnaıy qurylǵan komıssııa 27 mamyr kúni úzdik úsh dızaınerdiń jumysyn iriktep alady. Keıin úlgiler agenttiktiń saıtynda ornalastyrylyp, oǵan árbir qazaqstandyq óz daýsyn bere alady. Eń kóp daýys jınaǵan jeńimpaz esimi jáne onyń daıyndaǵan kıim úlgisi 30 mamyr kúni jarııalanady. Úzdik dızaınerge «Sochı-2014» Olımpıadasyna baryp-qaıtýǵa eki joldama berilmek. Agenttiktiń aqparatyna sáıkes, atalmysh joldamalardyń naryqtaǵy quny 20 myń AQSh dollarynan asady.

«Sporttyq kıim jıyntyǵy 30-ǵa jýyq kıimnen turady. Onyń quny tigýshi kompanııa anyqtalǵan soń belgili bolady. Vankýver Olımpıadasyn alatyn bolsaq, bir sportshynyń jıyntyq kıimine 347 myń teńge jumsaldy. Bul joly budan da kóp bolady dep oılap otyrmyz. Óıtkeni sapaly kıim daıyndaý úshin qomaqty qarajat shyǵyndaýǵa týra keledi», - dedi agenttik tóraǵasynyń orynbasary.

E.Qanaǵatovtyń aıtýynsha, kıimderdi tigý barysynda onyń sapasyna jáne jazýlardyń qate jazylmaýyna da úlken mán berilmek.

«Ondaı kemshilikter bunyń aldynda oryn alyp jatty. Oǵan da arnaıy kóńil bólemiz. Árbir kıim tekseriletin bolady. Jazýlardaǵy qatelikterdi boldyrtpaımyz», - dep atap kórsetti ol.

Eske sala ketsek, Týrınde ótken Aq Olımpıadada Italııanyń belgili dızaınerleri Domnıko Dolche men Stefano Gabbano "La Stampa" gazetinde qazaq sportshylary Olımpıadanyń ashylý saltana­tyna kıip shyqqan kıimderi basqa elderge qaraǵanda ádemi ári sándi bolǵanyn atap ótken bolatyn.