«Sochı-2014» Qysqy Olımpıadasynda Qazaqstan kem degende eki medaldan úmitti
ASTANA. 8 mamyr. QazAqparat - Qysqy sport túrleri boıynsha Ulttyq olımpıada quramasynyń aldyna ártúrli qundylyqtaǵy ekiden kem emes medal jeńip alý mindeti qoıylǵan.
Bul týraly Sport jáne dene shynyqtyrý isteri jónindegi agenttik tóraǵasynyń orynbasary Elsııar Qanaǵatov málim etti, dep jazady Primeminister.kz saıty.
«Ulttyq qurama komandasynyń aldyna lıtsenzııa sany boıynsha da, sport túrleri sany boıynsha da Vankýverdegige qaraǵanda jaqsy nátıje kórsetý mindeti qoıylǵan. Sochıde ótetin Olımpıadada ártúrli deńgeıdegi ekiden kem emes medal utyp alý mindetin alǵa qoıdyq», - dedi E. Qanaǵatov.
Vedomstvo basshysynyń orynbasary álem chempıonattarynda jáne kýboktik jarystarda sátti oıyn kórsetken sportshylar marapatqa negizgi úmitkerler ekenin atap ótti.
«Eger Sochıdegi marapattarǵa negizgi úmitkerler týraly aıtatyn bolsaq, aldymen, shańǵy jarysynda - Alekseı Poltoranın, ol álem chempıonatynda jáne kýboktik jarystarda turaqty nátıje kórsetti. Bul rasymen de, Sochıde ótetin Olımpıadada medaldar jeńip alady dep úlken úmit artyp otyrǵan sportshymyz», - dep óz oıymen bólisti E. Qanaǵatov.
Budan ózge, ol komandalyq sprıntte N. Chebotko men A.Poltoranınge úmit artylatynyn aıtty.
Qazaqstannyń negizgi qarsylastary týraly aıta otyryp, E.Qanaǵatov Reseı, Norvegııa, Shveıtsarııa shańǵyshylaryn atady.
Álem chempıonattarynda kórsetken nátıjelerdi eskersek, konkı tebý sportyndaǵy, mánerlep syrǵanaý jáne frıstaıl mogýldegi, bıatlondaǵy sportshylar jaqsy nátıje kórsetýi múmkin.
Esterińizge sala keteıik, Vankýverde 2010 jyly ótken Qysqy Olımpıadada Qazaqstan 1 kúmis medal jeńip alyp, jalpy esepte 25-inshi oryndy ıelengen bolatyn.
Sochı qalasyndaǵy (Reseı) XXVII Qysqy Olımpıada oıyndary 2014 jyldyń 7- 23-shi aqpan aralyǵynda ótetini málim.
Jarys barysynda 15 sport túri boıynsha 98 medal jıyntyǵy oınatylady. Lıtsenzııalyq jarys 2014 jyldyń qańtaryna deıin jalǵasady.
