SOCAR Baký–Tbılısı–Jeıhan munaı qubyrynyń operatsııalyq basqarýyn óz qolyna aldy
ASTANA. KAZINFORM — Ázerbaıjannyń memlekettik munaı kompanııasy SOCAR 1 shildeden bastap Baký–Tbılısı–Jeıhan (BTJ) munaı qubyrynyń operatory mindetin resmı túrde óz moınyna aldy, dep habarlaıdy Kazinform agenttiginiń Bakýdegi menshikti tilshisi.
BP Azerbaijan kompanııasynyń málimetinshe, munaı qubyryn operatsııalyq basqarý fýnktsııalary BP kompanııasynan SOCAR-dyń enshiles uıymy — SOCAR Midstream Operations kompanııasyna berildi. Basqarý Ázerbaıjan, Grýzııa jáne Túrkııa aýmaǵy arqyly ótetin munaı qubyrynyń barlyq úsh ýchaskesin qamtıdy.
Qol jetkizilgen kelisimderge sáıkes, Ázerbaıjan tarapy munaı qubyryndaǵy barlyq operatsııalyq protsesterdi, sondaı-aq BTJ júıesi men Ońtústik Kavkaz qubyryna birdeı qatysty birlesken tehnıkalyq operatsııalardy basqarýdy ózine alady.
Sonymen qatar, joba aktsıonerleriniń quramy ózgerissiz qalady. Al BP kompanııasy Sangachal termınalyn basqarýdy jalǵastyrady.
SOCAR prezıdenti Rovshan Nadjaf Baký–Tbılısı–Jeıhan munaı qubyry sońǵy jıyrma jyl boıy Ázerbaıjannyń kóregen energetıkalyq strategııasy men tıimdi halyqaralyq yntymaqtastyǵynyń sımvolyna aınalǵanyn atap ótti.
— Sońǵy 20 jyl ishinde BTJ Ázerbaıjannyń ornyqty damýyna, óńirlik yqpaldastyqtyń nyǵaıýyna jáne jahandyq energetıkalyq qaýipsizdiktiń artýyna eleýli úles qosty, — dedi kompanııa basshysy.
Óz kezeginde BP kompanııasynyń Ázerbaıjan, Grýzııa jáne Túrkııa boıynsha óńirlik prezıdenti Djo Krıstofolı operatorlyq basqarýdy berý joba tarıhyndaǵy mańyzdy kezeń ekenin aıtyp, SOCAR strategııalyq ınfraqurylymdy joǵary deńgeıde basqarýdy jalǵastyratynyna senim bildirdi.
Aıta keteıik, paıdalanýǵa berilgen ýaqyttan beri Baký–Tbılısı–Jeıhan munaı qubyry arqyly 4,7 mıllıard barrelden astam munaı, ıaǵnı shamamen 630 mıllıon tonna shıkizat álemdik naryqtarǵa 6,2 myńnan astam tankermen jetkizilgen.
Qazirgi tańda BTJ arqyly Azerı–Chırag–Gúneshli ken ornynan óndiriletin munaı, Shahdenız ken ornynyń kondensaty, sondaı-aq Kaspıı óńiriniń basqa elderinen, onyń ishinde Qazaqstan men Túrikmenstannan jetkiziletin shıkizat eksporttalady.
Buǵan deıin Ázerbaıjan Túrikmenstanǵa «Dostlýg» munaı tankerin syıǵa tartqan bolatyn. Sondaı-aq Ázerbaıjanda «Azneft» óndiristik birlestiginiń sýasty qubyrynan munaıdyń aǵý sebebi anyqtalyp, joıylǵany habarlanǵan edi.
