Soca-Cola Qytaıda santehnıkalyq qural dep tanylǵany ras pa

Áleýmettik jelilerde Soca-Cola gazdalǵan sýsyny Qytaıda resmı túrde santehnıkalyq suıyqtyqtar sanatyna aýystyrylatyny týraly aqparat tarap jatyr. Qazaqstandyqtar da buǵan qatysty óz pikirlerin jazyp, tanymal sýsyndy ishpeı turyp, oılanýǵa keńes beredi. Stopfake.kz aqparattyń anyǵyna jetip kórdi, dep habarlaıdy QazAqparat.

Taratylǵan vıdeoda er adam Soca-Cola alkogolsiz sýsyny Qytaıdyń Ortalyq komıtetiniń sheshimimen santehnıkalyq suıyqtyqtar qataryna kóshiriletinin, ol qubyrlardy tazartýǵa paıdalanylatynyn aıtady. Mundaı sheshimge ǵylymı zertteý negiz bolǵan-mys. Tájirıbege Qytaı túrmelerindegi 500 adam qatystyrylǵan. Olar alty aı boıy sýsyndy kúnine úsh ret ishken. Saldarynan 75 adam kóz jumsa, taǵy 150-i múgedek bolyp qalǵan.

Stopfake.kz mundaı aqparatty jarııalaǵan birde-bir iri qytaılyq BAQ, ne resmı saıtty tappaǵan. Sondaı-aq izdeý júıesine qytaı tilinde «Soca-Cola», «Qytaı» jáne «santehnıka» sózderin engizip kórgen. Alaıda bul sózdermen baılanysty atalǵan aqparatqa uqsas eshbir málimet shyqpaǵan.

«Al osy sózderdi oryssha jazyp kórgende, bul jańalyqtyń bastapqy kózi tez tabyldy. Bul «Panorama» satıra portaly eken. Atalǵan portal shynaıy jańalyqtardy jylyna bir ret – 1 sáýirde jarııalaıdy. Dál osy aqparat 2018 jyldyń 25 tamyzynda shyqqan, ıaǵnı bul – ázil.
Osyǵan qaramastan, keıbir buqaralyq aqparat quraldary satıralyq portalǵa senip, jańalyqty shynaıy dep taratqan. Sodan beri ol jelide mezgil-mezgil talqylanyp, qyzý pikirtalas týdyrady. Máselen, habarlama 2018 jyly, sodan keıin 2019 jyly talqylanǵan, endi 2023 jyly taǵy da adamdardyń nazaryn aýdardy.
Olaı bolsa, Qytaıda Soca-Cola santehnıkalyq suıyqtyqtar sanatyna engizilgeni týraly aqparat – bul jeli qoldanýshylary bes jyldan beri shyndyq dep kele jatqan ázil», - dep túıindedi feık jańalyqtardy áshkereleıtin resýrs.