Snoýdenniń ákesi Reseıge baratyn vızaǵa ıe boldy
ASTANA. 12 tamyz. QazAqparat - Lon Snoýden men Brıýs Feın Máskeýge barýǵa nıetti, dep habarlady Bı-Bı-Sı.
Ortalyq barlaý basqarmasynyń burynǵy qyzmetkeri Edvard Snoýdenniń ákesi Reseıdegi balasyna baryp kelý úshin vıza aldy. Olardyń aıtýyna qaraǵanda, Reseıge olar birge barady.
E. Snoýdenniń ákesi men Feın naqty kúni baratyndaryn aıtpady, alaıda zańger Reseıge «óte jaqyn arada» jolǵa shyǵatyndaryn aıtyp qaldy.
Qorǵaýshynyń qatysýymen Lon Snoýden ulymen AQSh tarapynan Edvardqa tyńshylyq jasady degen taǵylyp otyrǵan aıypty qalaı joqqa shyǵarý kerektigin qarastyrmaq.
«Meniń ulym óziniń budan bylaı qaıda turatynyn ózi sheshedi. Alaıda men ol úshin AQSh-qa qaıtyp kelý múmkindigi paıda bolǵanyn qalaımyn», - dedi Lon Snoýden.
Alaıda Edvard Snoýdenniń ákesiniń sózine qaraǵanda, oǵan óz Otanynda amerıkalyq bılik ókilderi tarapynan ádil sot sheshimi shyǵarylady degenge sený qıyn.
Ortalyq barlaý basqarmasynyń qashqyn qyzmetkeriniń ákesi ulymen ol AQSh-tan ketkennen beri tildespegenin aıtty. Osyǵan deıin Reseıdiń bılik ókilderi Snoýdenge baspana bergen bolatyn.
Eske sala ketsek, Edvard Snoýden batys BAQ-na amerıkalyq arnaıy qyzmet júzege asyratyn telefon qońyraýlaryn tyńdaý, ınternet arqyly aqparatpen almasýdyń kólemdi baǵdarlamasyn jarııa etken bolatyn.
