Snoýdenniń ákesi: Balamnyń ornynda bolsam, Reseıde qalar edim
ASTANA. 31 shilde. QazAqparat - AQSh arnaıy qyzmetiniń burynǵy agenti Edvard Snoýdenniń ákesi Lon «Reseı-24» telearnasyna bergen suhbatynda eger balasynyń ornynda bolsa, Reseıde qalatynyn málim etti. Bul týraly VVS habarlady.
Sonymen qatar ol reseılik bılik Edvardqa ýaqytsha baspana beredi degen úmitin bildirgen.
«Meniń oıymsha, Reseıde balamdy qorǵaýǵa jáne oǵan zııan keltirýge nıettilerden arashalaýǵa tabandylyq pen múmkindik bar», - dedi Lon Snoýden.
«Sondyqtan da onyń ornynda bolsam, men Reseıda qalar edim. Osy oraıda Reseı osyndaı qadam jasaıdy degen (baspana beredi) úmittemin», - dep tolyqtyrdy ol.
Lon Snoýden sonymen qatar Reseı halqyna, Vladımır Pýtınge jáne osy eldiń úkimetine ulyn qaýipsizdikte saqtaý turǵysyndaǵy kúsh-jigerine alǵysyn aıtty.
Eske sala ketsek, ótken aıda Edvard Snoýden AQSh arnaıy qyzmetiniń túrli elderdegi azamattardyń ınternettegi jáne telefondaǵy baılanystaryn jasyryn tyńdaıtyn qupııa baǵdarlamasyn jurtshylyqqa jarııa etken bolatyn. Baǵdarlama halyqaralyq deńgeıde daý týdyryp, AQSh-tyń odaqtastary da oǵan narazylyqtaryn bildirgen edi.
Ol 23 maýsymda Gonkongten Máskeýge ushyp kelip, sodan beri Sheremetevo áýejaıynda turyp jatyr. Amerıkandyq reseılik bılikten ýaqytsha baspana berý týraly ótinish jasady.
