Snoýden Rıdenaýrdyń «Shyndyǵy úshin» syılyǵyna ıe boldy
ASTANA. QazAqparat - Amerıkandyq qashqyn Edvard Snoýden «Shyndyǵy úshin» atalymynda Rıdenaýr syılyǵynyń laýreaty atandy.
Budan bólek, Snoýdenniń qujattarymen jumys istegen osy atalymda kınodokýmentalıst Lora Poıtras syılyqqa ıe boldy. Bul syılyq 2004 jyly Vetnam soǵysynyń ardageri, jýrnalıst Ron Rıdenaýrdyń esteligine oraı taǵaıyndaldy. Ol Vetnamda amerıkandyq soldattardyń beıbit turǵyndardy óltirýine baılanysty oqıǵany tekserip, jaryqqa shyǵarǵannan keıin tanylǵan edi. Laýreattar «Shyndyǵy úshin», «Batyldyǵy úshin», «Jyl kitaby» jáne «Jyldyń úzdik derekti fılmi» atalymdary boıynsha marapattalady. «Snoýdenniń is-qımyly memlekettik tyńshylyqtyń róli týraly budan buryn bolyp kórmegen qoǵamdyq rezonans pen pikirtalas týdyrdy. Alaıda, osy qadamy úshin ol búginde úlken qurbandyqqa bardy»,-delingen atalǵan syılyqtyń resmı saıtynda. Búginde Edvard Snoýdendi AQSh-tyń federaldyq bıligi tyńshylyq jasady dep aıyptaýda. Oǵan bir jyl ýaqytqa Reseıde ýaqytsha baspana berildi.
