SMS servısi 25 jasta: Jylyna 9 trln habarlama jiberiledi
ASTANA. QazAqparat - Osydan 25 jyl buryn álemdegi alǵashqy SMS-habarlamasy joldandy, dep habarlaıdy VVS .
1992 jylǵy 3 jeltoqsanda Vodafone telekommýnıkatsııa gıgantynyń tapsyrysy boıynsha tehnologııalyq ázirlemelermen aınalysatyn Sema Group Telecoms fırmasynyń 22 jastaǵy ınjeneri, brıtanııalyq Neıl Papýort óz kompıýterinen álemdegi alǵashqy SMS-habarlamany jiberdi.
Jas ónertapqysh Vodafone dırektory Rıchard Djarvıstiń uıaly telefonyna jibergen mátin eki sózden turatyn edi: «Merry Christmas» («Rojdestvo qutty bolsyn!»).
Papýort tarıhı oqıǵaǵa qatysatyny jeti uıyqtap, túsine kirmegenin aıtady. Sońǵy 150 jylda adamzat ómirin ózgertken mańyzdy tehnologııalar AQSh-pen baılanysty. Biraq biz «esemes» (short message service - «qysqa habarlamalar qyzmeti») dep atap ketken servısti Eýropanyń telekommýnıkatsııa óndirisshileri birlese iske asyrdy.
1984 jyly Kopengagendegi ǵylymı konferentsııada Nokia Networks-tyń Fınlıandııadaǵy fılıalynyń ınjeneri Mattı Makkonen uıaly telefon arqyly qysqa mátinderdi jiberý ıdeıasyn alǵash ret aıtqan bolatyn.
Deutsche Telecom-nyń mamany Frıdhelm Hıllebrandt osy ıdeıany damyta túsip, latyn álipbıiniń 160 tańbasynan jáne bos oryndardan (probel) quralǵan formatty usyndy.
SMS paıdalanýshylar arasynda asa joǵary qarqynmen tanyldy. 2000 jyly álemde 18 mlrd aınalasynda SMS-habarlama jóneltildi, 2002 jyly bul kórsetkish 146 mlrd-qa jetti, al qazir jylyna shamamen toǵyz trıllıon habarlama jiberiledi, sonyń bir trıllıony AQSh-tyń úlesine tıesili. Bul - álemdegi árbir adam orta eseppen kúnine 4 habarlama jiberedi degen sóz.
