SMS-blaster arqyly alaıaqtyq jasaǵan qylmystyq top ustaldy
ASTANA.KAZINFORM — TMD elderi aýmaǵynda osyndaı shemanyń joly alǵash ret kesilgen jaǵdaı.
Qarjylyq monıtorıng agenttigi Qazaqstan Respýblıkasynyń Bas prokýratýrasy úılestirýimen jáne «TELE2» uıaly baılanys operatorynyń kıberqaýipsizdik mamandarynyń qatysýymen azamattardyń qupııa derekteri men aqshalaı qarajatyn urlaý maqsatynda fıshıngtik habarlamalardy jappaı taratýmen aınalysqan qylmystyq toptyń qyzmetin toqtatty.
Aıta ketý kerek, bul — TMD elderi aýmaǵynda osyndaı shemanyń joly alǵash ret kesilgen jaǵdaı.
— Qaskóıler uıaly baılanys operatorlarynyń bazalyq stantsııalarynyń jumysyn ımıtatsııalaıtyn arnaıy qurylǵy — SMS-blasterdi paıdalanǵan. Atalǵan qurylǵy paıdalanýshylarǵa jaqyn mańda, ıaǵnı 300 metr radıýsta kúshti sıgnal taratyp, telefondardyń avtomatty túrde soǵan qosylyp, qorǵanysy álsiz jelige aýysýyna sebep bolǵan.
Saldarynan abonentterdiń telefondaryna birden jalǵan SMS-habarlamalar kelip otyrǵan. Bul qurylǵy baılanys operatorlarynyń qorǵanysyn aınalyp ótip, saǵatyna 100 myńǵa deıin habarlama taratýǵa múmkindik bergen, — delingen QMA habarlamasynda.
Aýqymdy keńeıtý jáne jasyryn áreket etý maqsatynda jabdyq avtokólikterge ornatylyp, qozǵalys barysynda, negizinen adamdar kóp shoǵyrlanatyn oryndarda — bazarlarda jáne saýda-oıyn-saýyq ortalyqtarynyń mańynda paıdalanylǵan.
Habarlamalar Beeline jáne Halyk Bank kompanııalary atynan jiberilgendeı kórinip, jınalǵan bonýstardy aıyrbastaý usynylǵan. Siltemege ótken jaǵdaıda paıdalanýshylar fıshıngtik saıttarǵa túsip, taýar tańdaǵannan keıin jeke derekterin, sonyń ishinde telefon nómirin, aty-jónin, bank kartasynyń derektemelerin, CVV-kodyn, sondaı-aq SMS arqyly kelgen rastaý kodyn engizýge májbúr bolǵan.
Osylaısha, qaskóıler azamattardyń qupııa aqparaty men banktik qarajatyna qol jetkizgen.
Jedel-izdestirý is-sharalarynyń nátıjesinde qylmystyq top shemany júzege asyrýdyń bastapqy kezeńinde anyqtalyp, ustaldy. Bul azamattardyń aýqymdy aldanýy men eleýli qarjylyq shyǵyndarynyń aldyn alýǵa múmkindik berdi.
Qazirgi ýaqytta tórt kúdikti ustalyp, qamaýǵa alyndy.
Tergeý jalǵasyp jatyr.
Aıta ketelik Qazaqstannyń ornyqtylyq qory ózin ıpotekalyq broker, keńesshi nemese deldal retinde tanystyratyn «kómekshiler» tarapynan alaıaqtyq jaǵdaılarynyń jıilep ketkenin habarlaǵan edi.