«SMS-blaster» arqyly 150 myń alaıaqtyq habarlama taratqan top ustaldy
ASTANA. KAZINFORM — Astanada azamattardyń derbes derekteri men bank qarajatyn ıemdenýge baǵyttalǵan aýqymdy fıshıngtik shema áshkerelendi. Qylmystyq top tórt kún ishinde Beeline, Kcell jáne Activ abonentterine shamamen 150 myń jalǵan SMS-habarlama jibergen.
Astana prokýratýrasynyń úılestirýimen júrgizilgen jedel-tergeý sharalary barysynda qylmystyq toptyń áreketi anyqtalǵan.
Tergeý málimetinshe, bıyl qańtarda Ońtústik-Shyǵys Azııa elderiniń biriniń azamaty Qazaqstanda zańsyz qyzmet uıymdastyrý úshin jergilikti turǵynǵa aqshalaı syıaqy usynǵan. Keıin qylmystyq shemaǵa arnaıy jabdyqtyń jumysyn qamtamasyz etken basqa adamdar da qosylǵan.
Top uıaly baılanys bazalyq stantsııasynyń jumysyn ımıtatsııalaıtyn «SMS-blaster» qurylǵysyn paıdalanǵan. Onyń kómegimen operatorlardyń súzgileý júıelerin aınalyp ótip, abonentterge jappaı habarlama jiberilgen.
— Alaıaqtar SMS-terdi belgili kompanııalardyń atynan joldap, azamattarǵa túrli bonýsty aıyrbastaý týraly usynys jasaǵan. Habarlamadaǵy siltemege ótken adamdar jalǵan saıtqa baǵyttalǵan. Onda olardan jeke jáne banktik derekterin, sonyń ishinde tólem kartasynyń nómirin, CVV kodyn jáne SMS arqyly kelgen rastaý kodyn engizý talap etilgen, — delingen habarlamada.
Osylaısha, kúdiktiler azamattardyń qupııa derekteri men bank shottaryndaǵy qarajatyna qol jetkizgen.
Qazaqstan Respýblıkasynyń Qarjylyq monıtorıng agenttigi «SMS-blaster» qurylǵysyn tárkiledi. Saraptama onyń jedel-izdestirý is-sharalary men jasyryn tergeý áreketterin júrgizýge arnalǵan arnaıy tehnıkalyq qural ekenin anyqtaǵan.
Qylmystyq is QR Qylmystyq kodeksiniń 399-baby 2-bóligi boıynsha tergelip jatyr. Atalǵan bap aqparatty jasyryn alýǵa arnalǵan arnaıy tehnıkalyq quraldardy zańsyz daıyndaý, óndirý, satyp alý, ótkizý nemese paıdalanýǵa qatysty.
Qazirgi tańda tórt kúdikti qamaýda otyr. Sotqa deıingi tergeý jalǵasyp jatyr.
QR QPK-niń 201-babyna sáıkes, tergeýdiń ózge derekteri jarııalanbaıdy.
Eske salaıyq, buǵan deıin zańdy tulǵalardan kıberalaıaqtyqtyń aldyn alý talap etiletinin jazǵanbyz.
