SMS arqyly zeınetke shyǵý: azamattar neni bilýi kerek?
ASTANA. KAZINFORM — 1 qyrkúıekten bastap zeınetaqy taǵaıyndaý rásimi jeńildeıdi. Jańa júıe qalaı jumys istemek? Olqylyqtar qalaı retteledi? Jibek Joly arnasynyń «Búgin LIVE» baǵdarlamasyna suhbat bergen áleýmettik sala mamany osy suraqtarǵa jaýap berdi.
– Endi zeınetaqy tólemderiniń barlyǵy habarlama arqyly keledi. Ol úshin eń áýeli telefon nómirińizdi e-gov júıesiniń derekter bazasyna engizý kerek. Derekter bazasyna engen kezde zeınetke shyǵatyn azamatqa avtomatty túrde SMS habarlama keledi. Sol habarlamaǵa jaýap berý arqyly ótinishti elektrondy túrde jiberýge bolady, – deıdi Araı Muratqyzy.
Maman zeınetaqyǵa qalaı ótinish berý keregin túsindirdi.
– Zeınetke shyǵý ýaqyty jaqyndaǵan kezde sizge avtomatty túrde úsh túrli zeınetaqyǵa – jasyna, bazalyq jáne jınaqtyq zeınetaqylarǵa ótinish jiberiledi. Siz sol habarlamaǵa jaýap berýińiz kerek. Ótinim jiberilgennen keıin qandaı da bir qujattar jetispese, arnaıy óńdeýshi organdar sizdiń qujattaryńyzdy qaıta suratyp, zeınetaqyny taǵaıyndaýǵa úles qosady, – deıdi stýdııa qonaǵy.
Áleýmettik sala mamany QR azamattyǵynan bas tartqandar men qaıtys bolǵandardyń qordaǵy qalǵan aqshasyn qaıtaryp alýǵa bolatynyn aıtty.
– QR azamattyǵynan shyǵyp ketken nemese qaıtys bolǵan jaǵdaıda kez kelgen ýaqytta Biryńǵaı jınaqtaýshy zeınetaqy qory (BJZQ) arqyly ótinish jazyp, zeınetaqy jınaǵyn alýǵa bolady. Mysaly, qaıtys bolǵan azamattardyń BJZQ-daǵy jınaqtaryn muragerler sot sheshimimen ala alady. Alty aı ótken soń, murageri qordaǵy qalǵan aqshany sheship alýǵa quqyly. Oǵan qosa, qaıtys bolǵan adamdy jerleý úshin beriletin bir rettik járdemaqy ómirden ótken adamnyń jınaqtaý qorynan tólenedi. Bul járdemaqy adam qaza tapqannan keıin úsh kún ishinde taǵaıyndalady, – deıdi ol.
Avtomatty túrde taǵaıyndalǵan zeınetaqy tóleminde qate ketse, azamat qaıtadan ótinish berip, derekterin ózgerte alady. Al jańa júıeniń tıimdiligi qandaı?
– Qoldanystaǵy proaktıv júıe óte tıimdi. Zeınet jasyna jaqyndaǵan azamattar Halyqqa qyzmet kórsetý ortalyǵyna baryp, kezekke turyp, qujat jınaý úshin ýaqyt joǵaltpaıdy. Bul júıe jumysty jeńildetip, ónimdilikti arttyrady, – deıdi Araı Muratqyzy.
Maman qorǵa jıi túsetin shaǵymdarǵa da toqtaldy.
– 1998 jylǵa deıin eńbek etken azamattardyń eńbek ótili muraǵatqa ótpegendikten, shaǵym jıi túsedi. Mundaı jaǵdaıda azamattar buryn jumys istegen uıymǵa baryp, sotqa júginip, eńbek ótilin dáleldeı alady, – deıdi spıker.