Smolensk oblysynda atyraýlyq jaýyngerdiń elge joldaǵan haty tabyldy
ATYRAÝ. QazAqparat –Ekinshi dúnıejúzilik soǵysqa Atyraý (burynǵy Gýrev) oblysynan attanǵan jaýyngerdiń haty men qutysy Reseıdiń Smolensk oblysynan tabyldy. Biraq onyń aty-jóni ázirge belgisiz, dep habarlaıdy QazAqparat.
«Jaýyngerdiń haty Smolensk oblysy, Kardymov aýdany, Rýsanovo eldi mekeni
aýmaǵyndaǵy qaıyń toǵaıda izdeý-barlaý ekspedıtsııasyn ótkizý kezinde tabyldy.
Aldymen jaýyngerdiń qutysyn (flıajka), sodan keıin beldigin (fragmenttik) taptyq.
Olar aǵash tamyrynyń astynda 30-40 santımetr tereńdikte jatqan. Belgisiz
jaýyngerdiń medalonynda «Kaz. SSR. Gýrevskaıa oblast, g.Gýrev, Baksaıskıı r-n, poselka Saraıchık, polýchıt Erbatyrovoı Rahımoı» degen jazba bar. Biraq ókinishke qaraı jaýynger óziniń aty-jónin jazbaǵan», -dep habarlady «Pereprava» izdestirý otrıadynyń komandıri Natalıa Maksımova.
Eske sala ketelik, budan buryn soǵysta habarsyz ketken jaýyngerdiń qujaty tabylǵanyn jazǵan bolatynbyz.
