Smıtson ınstıtýty Qazaqstan mádenıetin AQSh-ta nasıhattaýǵa qoldaý kórsetedi
ASTANA. KAZINFORM – QR Premer-mınıstriniń orynbasary – Mádenıet jáne aqparat mınıstri Aıda Balaeva Smithsonian Institution Festival dırektory Rebekka Fentonmen jáne Southwest Folklife Alliance uıymynyń teń quryltaıshysy Braıan Rafael Felkonmen kezdesti.
QR Mádenıet jáne aqparat mınıstrligi baspasóz qyzmetiniń habarlaýynsha, kezdesý barysynda taraptar Qazaqstan men AQSh arasyndaǵy yntymaqtastyqty odan ári keńeıtýdiń perspektıvalaryn talqylady.
Aıda Balaeva Qazaqstan men Smıtson ınstıtýty arasyndaǵy ózara yqpaldastyqtyń joǵary deńgeıin atap ótip, ınstıtýttyń qazaq mádenıeti men ulttyq murany Amerıka Qurama Shtattarynda keńinen tanytýǵa baǵyttalǵan qyzmetiniń mańyzyna toqtaldy.
-Qyrkúıek aıyndaǵy sapary aıasynda Qazaqstan Respýblıkasynyń Prezıdenti Smıtson ınstıtýtynyń basshylyǵymen kezdesip, qazaq mádenıeti men elimizdiń mádenı murasyn halyqaralyq deńgeıde tanytýǵa baǵyttalǵan birlesken jumysty odan ári damytýǵa qoldaý bildirdi, – dedi Premer-mınıstrdiń orynbasary.
Aıda Balaeva yntymaqtastyqtyń perspektıvaly baǵyttary retinde qazaqstandyq sýretshiler men dástúrli qolóner sheberleriniń kórmelerin uıymdastyrýdy, tarıh, mýzyka jáne beıneleý óneri salalarynda birlesken zertteýler júrgizýdi, sondaı-aq eki eldiń ǵylym men bilim salasyndaǵy tájirıbe almasýyn atap kórsetti.
Sonymen qatar Úkimet basshysynyń orynbasary ekijaqty mádenı almasýdy keńeıtip, Qazaqstanda AQSh mádenıeti kúnderin ótkizýdi usyndy. AQSh tarapy Qazaqstan jurtshylyǵyna óz eliniń mádenı áralýandyǵyn tanystyrýǵa daıyn ekenin bildirdi.
Kezdesýde Qazaqstan mýzeıleri delegatsııasynyń AQSh-qa josparlanǵan saparyna da erekshe mán berildi. Delegatsııa quramyna elimizdiń jetekshi mýzeıleriniń basshylaryn engizý kózdelip otyr. Sapar baǵdarlamasy Smıtson ınstıtýtyna qarasty Azııa óneri ulttyq mýzeıiniń qyzmetimen tanysýdy, kásibı tájirıbe almasýdy jáne birlesken bastamalardy júzege asyrý joldaryn talqylaýdy qamtıdy.
Sondaı-aq qazaqstandyq HasSak etno-folklorlyq tobynyń Týson qalasynda ótetin festıvalge qatysýy jáne AQSh táýelsizdiginiń 250 jyldyǵyna oraı Vashıngtonda kontsert ótkizýi qarastyryldy.
Qazaqstannyń 2027 jylǵy Smithsonian Folklife Festival-ge daıyndyǵyna da aıryqsha nazar aýdaryldy. Atalǵan festıvalde elimizdiń salt-dástúri, mýzykasy, qolóneri jáne urpaqtan urpaqqa jalǵasyp kele jatqan mádenı murasy tanystyrylady.
Kezdesý qorytyndysynda taraptar bul júzdesý Qazaqstan men Smıtson ınstıtýty arasyndaǵy yntymaqtastyqqa tyń serpin berip, jekelegen bastamalar aıasynan shyǵyp, uzaq merzimdi ári júıeli jobalardy júzege asyrýǵa múmkindik beretinine senim bildirdi.
Osyǵan deıin Qazaqstan ShYU elderi arasynda mádenıet salasyn tsıfrlyq baǵytta damytýdy usynǵan bolatyn.
