Smırnovaǵa qysym kórsetkenderdi sot arqyly jazalaımyz — Magerram Magerramov

ASTANA. KAZINFORM — Májilis depýtaty Magerram Magerramov partııalasy Irına Smırnovanyń Qazaqstanda Reseıdegideı «shetel agenti» uǵymyn engizý týraly bastamasynan keıin týyndaǵan daýǵa baılanysty málimdeme jasady.

— Májilistiń ótken otyrysynda Qazaqstan Halyq partııasy fraktsııasynyń depýtaty Irına Smırnova elimizde sheteldik agentter týraly zań qabyldaý týraly bastama kóterip, depýtattyq saýal joldady. Usynystyń máni sheteldik úkimettik emes uıymdardyń qyzmetine ashyqtyq belgileý edi.  Mundaı zańdar sol AQSh, Frantsııa, Avstralııa jáne basqa elderde burynnan bar. Áriptesimizdiń bul bastamasy jaýapty patrıot azamattardyń qoldaýyna ıe boldy.
Sonymen birge bul saýal belgili bir adamdardyń óte agressıvti reaktsııasyn týdyrdy. Depýtattyń syrtynan jalǵan, ashyq qorlaý jáne qorqytý áreketteri bastaldy, — dedi ol.

Depýtat bul áreketterdi partııa aıaqsyz qaldyrmaıtynyn eskertti.

— Ol áreketterdi uıymdastyrýshylar uzaq ýaqyt boıy USAID sııaqty sheteldik uıymdardan qarjy alǵan, áli de alyp júrgen bolýy múmkin ekeni aıtylyp jatyr. Tipti shet memleketterden tikeleı alýlary da múmkin. Kópshilik aldynda ózin aqtaý úshin hakerlerge siltep jatqandardyń áreketi ekiudaı áser qaldyrady. Depýtatty qorqytý áreketin sheteldik demeýshilerdiń tapsyrysy ma dep oılaýǵa da bolady. Biz quzyretti organdardy zań men quqyqtyq tártip qaǵıdattaryn buzýdyń barlyq áreketterin úzildi-kesildi toqtatýǵa shaqyramyz. Qazaqstan Halyq partııasy sot tártibimen ádildikke umtylady, Parlament Májilisiniń depýtaty I.Smırnovanyń atyna jasalǵan qorlaý jazasyz qalmaıdy, — dedi Magerram Magerramov.

Eske salsaq, Májilis depýtaty Irına Smırnova Premer mınıstrdiń atyna elimizde sheteldik agentterge qatysty zań kerektigin aıtyp, saýal joldaǵan edi.