Smaıylov: TMD Atqarýshy komıteti basqa eldermen jaqyndasý úshin jańa múmkindikter jasaýy tıis

ASTANA. QazAqparat – TMD Atqarýshy komıteti basqa eldermen jaqyndasý úshin jańa múmkindikter jasaýy tıis. Bul týraly TMD Úkimet basshylary keńesiniń keńeıtilgen quramdaǵy otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Bıyl Qazaqstan TMD-ǵa tóraǵalyq etedi. Tóraǵalyǵymyzdy iske asyrý aıasynda barlyq baǵyttardaǵy ózara is-qımyldy tereńdetý boıynsha praktıkalyq jumys júrgizildi. Biz ony TMD-da qalyptasqan sabaqtastyqqa jáne uıymnyń negizgi qujattaryna sáıkes júzege asyrdyq. Birlesken jumystyń qorytyndysy naqty is-sharalar keshenin iske asyra otyryp, TMD-nyń barlyq jarǵylyq jáne salalyq organdarynyń otyrysyn ótkizý boldy», - dedi Álıhan Smaıylov.

QR Premer-Mınıstri Qazaqstannyń tóraǵalyǵy kezinde atqarǵan jumystaryna kómek kórsetkeni úshin Belarýs Respýblıkasy men Qyrǵyz Respýblıkasynyń teń tóraǵalaryna alǵysyn bildirdi.

«Qazaqstan Prezıdenti Qasym-Jomart Toqaev Dostastyq memleketteri basshylary keńesiniń jýyrdaǵy otyrysynda jańa ınstıtýttar – TMD baıqaýshysy jáne seriktesin qurýǵa bastama jasady. Atqarýshy komıtet taraptarmen birlesip, osy mańyzdy ıdeıany pysyqtaýmen aınalysady. Bul jumystyń nátıjesi TMD-ny basqa eldermen jáne halyqaralyq qurylymdarmen jaqyndastyrý úshin jańa múmkindikter jasaý bolýy tıis», - dedi Úkimet basshysy.

Foto: t.me/KZgovernment