Smaıylov koronavırýstyń Qazaqstan ekonomıkasyna qalaı áser etkenin aıtyp berdi
«Memlekettik bıýdjettiń kiristeri esep berilip otyrǵan kezeńniń josparyna qaraǵanda 97,3 paıyzǵa, olardyń ishinde respýblıkalyq kirister 83 paıyzǵa, jergilikti bıýdjetter – 145,3 paıyzǵa oryndaldy. Respýblıkalyq bıýdjettiń kiristeriniń tolyǵymen oryndalmaýy – kelesi syrtqy faktorlardyń áserinen bolyp otyr. Birinshiden, Qytaıda ótken jyldyń sońynda paıda bolǵan koranovırýs epıdemııasynyn taralýy ımportqa salynatyn qosylǵan qun salyǵynyń kólemine teris áserin tıgizýde. Atap aıtqanda, bıyl aqpan aıynda qytaılyq ımporttyń kólemi 2019 jyldyń aqpanymen salystyrǵanda 11 paıyzǵa, al fızıkalyq kólemi 27 paıyzǵa tómendedi», - dedi Álıhan Smaıylov Úkimet otyrysynda.
Qarjy mınıstriniń aıtýynsha, osynyń saldarynan Qytaıdan keletin ımporttyq taýarlardan túsetin kedendik bajdar men salyqtardyń kólemi 12 paıyzǵa, ıaǵnı 2,1 mlrd teńgege azaıǵan.
«Jalpy eseptik kezeńde Qytaıdan keletin avtokólik quraldarynyń sany 24 paıyzǵa jáne temirjol kólikteri 14 paıyzǵa azaıdy. Odan basqa, aqpan aıynda Eýrazııalyq ekonomıkalyq odaq elderinen ımport tasymaldaıtyn avtokóliktiń sany 20 paıyzǵa tómendedi», - dedi ol.
Álıhan Smaıylov sondaı-aq, syrtqy naryqta baǵalardyń tómendeýi de respýblıkalyq bıýdjettiń kiristeriniń tolyǵymen oryndalmaýyna sebep bolyp otyrǵanyn aıtady.
«Mystyń baǵasy 6 paıyzǵa, alıýmınıı 5 paıyzǵa, myrysh 10 paıyzǵa, qorǵasynnyń 3 paıyzǵa tómendeýi korporatıvtik tabys salyǵyn tólemshilerdiń avanstyq tólemderiniń azıýyna áser etti. Sonymen birge, 18 ekinshi deńgeıli bankterdiń túsimderi 56 paıyzǵa azaıdy. Syrtqy teris faktorlardyń áserine qaramastan qosylǵan qun salyǵy boıynsha 2019 jyldyń uqsas kezeńimen salystyrǵanda 110,5 paıyzdyq ósim qarqyny qamtamasyz etildi», - dedi ol.
