Smaıylov elordadaǵy №3 jylý ortalyǵynyń qurylysy sozylyp ketkenin synǵa aldy

ASTANA. QazAqparat – Premer-Mınıstr Álıhan Smaıylov Úkimet otyrysynda jylý nysandaryndaǵy qordalanǵan máselelerdiń túpki sebepterin atady, dep habarlaıdy QazAqparat tilshisi.

«Sonymen qatar, qalalar keńeıip, qurylys sektory qarqyndy damýda. Abonentterdiń sany da artty. Munyń barlyǵy, birinshiden, qoldanystaǵy jylý rezervteriniń sarqylýyna alyp kelgenin kórip otyrmyz. Mundaı jaǵdaı Astana, Almaty, Pavlodar men Aqtaýda tirkeldi. Ekinshi jaǵynan, aýdandardyń durys josparlanbaýy bar. Turǵyn úıler men jylý jelilerin beıbereket salýy sýyq túse apatty jaǵdaılarǵa soqtyryp jatyr», - dedi Álıhan Smaıylov.

Sondaı-aq, ol qala ishinde aýany lastaıtyn avtonomdy qazandyqtar salynyp jatqanyna nazar aýdardy.

«Jeliler men jylý ortalyqtaryna jáne qazandyqtarǵa sapasyz qyzmet kórsetiledi. Tutynýshylar qaryzy jáne gazdandyrýda qıyndyqtar bar. Eń bastysy – jańadan jylý ortalyqtaryn salý jumystary sozylyp ketken. Buǵan mysal retinde elordadaǵy №3 jylý ortalyǵynyń qurylysyn aıtýǵa bolady. Sondyqtan, jelilerdiń tehnıkalyq jaǵdaıyn tekserýdi jalǵastyrý kerek», - dedi Álıhan Smaıylov.