Smaıylov: Memleket iri ǵylymı jobalardy shyǵyndar qurylymyn tolyq anyqtamaı qarjylandyryp otyr
ASTANA. KAZINFORM — 2025 jyly ǵylymı jáne kommertsııalandyrý jobalarynda 3 mıllıard teńgeden astam somaǵa buzýshylyqtar anyqtaldy. Bul týraly Quryltaı otyrysynda Joǵary aýdıtorlyq palata tóraǵasy Álıhan Smaıylov aıtty.
— Jobalardyń qarjylandyrylýy árdaıym nátıjege qol jetkizýge baǵyttalmaǵan. Baǵdarlamalyq-nysanaly qarjylandyrý aıasynda 79 jobaǵa iske asyrý shyǵystary egjeı-tegjeıli naqtylanbastan 62 mıllıard teńge bólindi, ıaǵnı, memleket iri ǵylymı jobalardy shyǵyndar qurylymyn tolyq anyqtamaı qarjylandyrdy, — dedi palata tóraǵasy.
Onyń aıtýynsha, oryndaýshyǵa yqpal etýdiń qarjylyq tetigi múldem joq deýge bolady. Jobanyń qorytyndy baǵalaýdan keıin qalǵan qarjylandyrýdyń úlesi sońǵy jyl qarjysynyń 10%-in nemese jalpy qunynyń 2-4%-in ǵana quraıdy. Demek, esep qabyldanbaǵan jaǵdaıda da qarjynyń basym bóligi jobany oryndaýshylarda qalady.
— 16 mıllıard teńgeni quraıtyn 176 joba boıynsha túpkilikti nátıjege qol jetkizý qamtamasyz etilmegen. Saraptama ortalyǵynyń monıtorıngi jobalardaǵy kemshilikterdi anyqtaǵanymen, olardy retteýge qatysty mindetti sheshimderdi qabyldaýǵa alyp kelmedi. 2025 jyly eki myńnan astam ǵylymı jáne kommertsııalandyrý jobalary monıtorıngpen qamtylyp, 3 mıllıard teńgeden astam somaǵa buzýshylyqtar anyqtaldy. Alaıda Ulttyq ǵylymı keńester aqparatty nazarǵa alýmen shekteldi, — dedi Álıhan Smaıylov.
Palata tóraǵasynyń dereginshe, 2023-2025 jyldary 393 ǵylymı-tehnıkalyq tapsyrmadan somasy 67 mıllıard teńgeni quraıtyn 149 tapsyrma iske asyrylmaǵan.