Smaıylov: Bıýdjettik baǵdarlamalardyń ákimshileri meni aldaı almaıdy
ASTANA. KAZINFORM – Joǵary aýdıtorlyq palatanyń tóraǵasy Álıhan Smaıylov óz mindetterine nemquraıly qaraǵan bıýdjettik ákimshilerge naqty kemshilikterin kórsetetinin aıtty.
Búgin Májilistiń jalpy otyrysynan keıin tilshiler aýdıtorlyq palata tóraǵasynan Úkimet basshysy retindegi burynǵy laýazymy men qazirgi qyzmetine qatysty suraq qoıdy.
«Búgin siz Joǵary aýdıtorlyq palatanyń tóraǵasy retinde 2023 jyldaǵy óz jumysyńyzdy baǵalap jatyrsyz. Bul turǵyda qaıshylyq bar dep oılamaısyz ba?», - dep surady tilshiler.
Óz kezeginde Á.Smaıylov qaıshylyq joq ekenin aıtty.
«Premer-Mınıstr qyzmetine toqtalsam, bıýdjettik baǵdarlamalardyń ákimshileri tıisti qarajatty surady. Olar bul qarajatty qandaı maqsatta suraǵanyn jáne qaı negizdemege súıengenderi maǵan óte jaqsy málim. Biz sol bıýdjettik protsestiń negizinde tıisti qarajatty naqty máselelerdi sheshýge, jobalardy oryndaýǵa belgilep, baǵdarladyq. Іs júzinde bul qarjy qanshalyqty maqsatqa saı ári tıimdi ıgerilýine qatysty atalǵan bıýdjettik baǵdarlamalardyń ákimshileri jaýapty. Ókinishke qaraı, talaptardy buzý jaǵdaılary bolyp jatady. Joǵary aýdıtorlyq palata tóraǵasy retinde osy ákimshilermen kezdesip, aýdıtorlyq jumystyń negizinde qarajattyń qanshalyq tıimdi paıdalanǵanyn kórsetemin. Olar túrli argýmentti aıta almaıdy, sebebi meni aldaı almaıdy. Atap aıtqanda, bul qarajatty bólgen kezde, olar maǵan kelip, naqty jobalardy aıtqan edi. Sondyqtan olardan naqty suraýǵa mende tolyq múmkindik bar», - dedi ol.
Aıta keteıik, búgin Májilistiń jalpy otyrysynda QR Úkimetiniń jáne Joǵary aýdıtorlyq palatanyń 2023 jylǵy respýblıkalyq bıýdjettiń atqarylýy týraly esepteri qaraldy.
Buǵan deıin Joǵary aýdıtorlyq palata tóraǵasy bıýdjet ákimshilerine qatań suraý bolatynyn eskertti.
Eske salsaq, Álıhan Smaıylov 2022 jylǵy 11 qańtarda QR Prezıdentiniń Jarlyǵymen QR Premer-Mınıstri laýazymyna taǵaıyndaldy.
2024 jyldyń aqpanynda Prezıdent Úkimetti otstavkaǵa jiberdi.
Al bıyl sáýir aıynyń basynda Á.Smaıylov Qazaqstan Respýblıkasy Joǵary aýdıtorlyq palatasynyń tóraǵasy laýazymyna taǵaıyndaldy.
