Smaıylov «Báıterek» pen «Samuryq-Qazynanyń» aktıvterdi basqarý qyzmetin synady
ASTANA. KAZINFORM — Joǵary aýdıtorlyq palatanyń tóraǵasy Álıhan Smaıylov «Báıterek» holdıngi, «Samuryq-Qazyna» qorynyń aktıvterdi basqarý qyzmetin synǵa aldy.
— Jekeshelendirýdiń 2021-2025 jyldarǵa arnalǵan keshendi josparyn iske asyrý qarqyny tómendegen. 2024 jyly nebári 14 obekt satyldy. Oń nátıje retinde byltyr respýblıkalyq bıýdjetten kvazımemlekettik sektordy qarjylandyrý kólemi 29%-ǵa jýyq qysqardy. Degenmen holdıngterdegi aktıvterdi utymsyz basqarý faktilerine jol berý jalǵasyp keledi, — dedi Álıhan Smaıylov Májilistiń jalpy otyrysynda.
Odan ári Joǵary aýdıtorlyq palata tóraǵasy naqty mysal keltirdi.
— Máselen, «Báıterek» holdınginiń kompanııalary jeńildikpen beriletin resýrsty túpkilikti alýshylarǵa jetkizý merzimin uzaqqa sozady. Jobalardy irikteý protsesi jetkilikti deńgeıde ashyq emes. Málimdelgen KPI-ǵa jetpegen nemese qarsy mindetteme múldem qarastyrylmaǵan jobalarǵa qoldaý kórsetilgen. «Samuryq-Qazyna» qory jalpy quny 239 mlrd teńge bolatyn taý-ken, metallýrgııa jáne ónerkásip salalaryndaǵy 13 jobany toqtatqan, — deıdi ol.
Buǵan deıin Joǵary palata tóraǵasy elimizde iri salyq tóleýshilerge monıtorıng júıesiz júrgiziletinin aıtqan edi.