Smaıylov Bas prokýratýraǵa joldanǵan 5 isti jeke-jeke atap berdi
ASTANA. KAZINFORM – QR Joǵarǵy aýdıtorlyq palatasynyń tóraǵasy Álıhan Smaıylov farmatsevtıka salasyna 2024 jáne 2025 jyldary júrgizilgen aýdıt nátıjesinde Bas prokýratýraǵa joldanǵan isterdi atap berdi.
- Birinshi fakt – ótken jylǵy aýdıt nátıjesi boıynsha anyqtaldy. Ol dárilik zattar men medıtsınalyq buıymdardyń elge kirýine ruqsat qujattaryn zańsyz berýge qatysty, - dedi ol Májilistiń jalpy otyrysynan keıingi baspasóz máslıhatynda.
Odan bólek, spıker bıylǵy aýdıtter nátıjesinde taǵy 4 fakt anyqtalǵanyn atap ótti.
- Onyń ishinde klınıkalyq zertteýler aıasynda aıaqtalmaǵan jumys úshin Densaýlyq saqtaý mınıstrliginiń tólem jasaý deregi bar. Kelesisi, Infektsııalyq aýrýlar ǵylymı ortalyǵynyń ózderi júzege asyrǵan Ǵylymı-tehnıkalyq baǵdarlama aıasynda tıisti qurylǵylardy almaýyna qatysty. Úshinshisi, biryńǵaı dıstrıbıýterge sheteldik medıtsınalyq qolǵapty otandyq ónim retinde kórsete otyryp, joǵary baǵada satý faktisi. Sońǵysy, ambýlatorlyq-emdeý aıasynda tegin berilýi tıis dári-dármektiń jeke dárihanalar sóresinen tabylýyna qatysty, - dedi Álıhan Smaıylov.
Aıta keteıik, buǵan deıin osy aýdıt aıasynda 5 is Bas prokýratýraǵa joldanǵanyn jazǵan edik.