Smartfonsyz memlekettik qyzmetkerlerdiń kásibı múmkindikteri shektelip otyrǵan joq - Á. Kómekbaev
ASTANA. QazAqparat - QR Memlekettik qyzmet isteri mınıstrligi Memlekettik qyzmet departamentiniń dırektory Álı Kómekbaev memlekettik qyzmetkerlerge smartfonnyń qajeti de shamaly dep esepteıdi.
Bul týraly ol búgin Ortalyq kommýnıkatsııalar qyzmetinde ótken baspasóz máslıxatynda málim etti.
"Mende qarsy saýal bar, smartfon ne úshin qajet? Smartfon bolmaǵan soń, áleýmettik jelide otyrýǵa jáne bireýmen áńgimelesýge múmkindik bolmaıdy. Biraq memlekettik qyzmetkerlerdiń kásibı qyzmetine qatysty barlyq múmkindikter saqtalǵan. Internetteri bar, telefondary bar. Árbiriniń kompıýterinde ınternet jelisi qosylǵan. Árıne áleýmettik-saýyqtyq jelilerge kirý múmkindikteri joq", - dep atap ótti Á. Kómekbaev.
Departament basshysynyń oıynsha, smartfonsyz tipti jumys isteý yńǵaıly.
"Birinshi kúnnen bastap bizde smartfon qoldaný degen joq. Mınıstrlikte birinshi qabatta arnaıy jáshikter bar. Biz sol jerge tapsyramyz. Biraq men ony tipti jumysqa ákelýden qaldym jáne smartfonsyz ómir yńǵaıly ma dep oılap otyrmyn. Ol mende úıde jatyr, tipti qospaımyn da. Jumysqa qarapaıym qalta telefonymen kelemiz. Onyń qýaty 5 kúnge deıin jete beredi, yńǵaıly sekildi", - dedi ol.
