Smartfonsyz halyq pen bıliktiń baılanysy úzilmeıdi - mınıstr Abaev

ASTANA. QazAqparat- Búgin XIV Eýrazııalyq medıa forýmda QR Aqparat jáne kommýnıkatsııalar mınıstri Dáýren Abaev memlekettik qyzmetshilerge smartfondy ustaýǵa tyıym salý máselesi boıynsha óz pikirin bildirdi. Zalda otyrǵan zańgerlerdiń bireýi «Jalǵan aqparatty xalyqqa jyldam túsindirý úshin memlekettik qyzmetshiler smartfon ustaýy tıis» degen oıyn jetkizdi, dep habarlaıdy QazAqparat tilshisi.

«Negizi, smartfondardy ustaý men jalǵan aqparat boıynsha birden jaýap berý - ol eki bólek nárse. Nege? Sebebi memlekettik organ kez kelgen jalǵan aqparatty aldymen tekserýi kerek. Mysaly, bir jerde jarylǵysh zat bar degen aqparat taraǵanda arnaıy organdar birinshi kezekte ondaı zattyń bar-joǵyn teksermeı me? Oǵan da ýaqyt qajet», - deıdi Abaev.

Mınıstrdiń aıtýynsha, qazirgi sheneýnikter baılanyssyz júrgen joq. Baılanysta bolý úshin mindetti túrde smartfon ustaýdyń qajeti shamaly. «Sondyqtan jalǵan aqparat boıynsha túsinikteme berýdiń smartfondy ustaý-ustamaýǵa esh qatysy joq. Ashyǵyn aıtý qajet, jalǵan aqparat - barshaǵa ortaq qaýip-qater. Onymen barsha álem kúresip keledi», - dep atap kórsetti Dáýren Áskerbekuly.

Aıta keteıik, sessııa barysynda Dáýren Abaev aqparattyń kóptigine, sol kóp aqparattyń adam ómirine qatty áser etip otyrǵanyna alańdap otyrǵanyn jetkizdi.