Smartfondy resmı tirkeý: elde qansha telefon buǵattaldy
ASTANA. KAZINFORM — QR Jasandy ıntellekt jáne tsıfrlyq damý mınıstrligi byltyrdan bastap abonenttik uıaly baılanys qurylǵylaryn tirkeý erejelerine engizilgen ózgeristerge qatysty túsinik berdi.
- Abonenttik qurylǵylardy verıfıkatsııalaý júıesi 2025 jylǵy 25 maýsymnan bastap turaqty jumys istep keledi. Osy ýaqyt ishinde aqparattyq júıede 9 mıllıonnan astam IMEI-kod tirkeldi. Buǵan qosa, zańsyz qurylǵylarmen kúres aıasynda naqty shekteý sharalary júrgizildi. 2026 jylǵy 20 sáýirdegi jaǵdaı boıynsha, «sur» tizimde bolý merzimi aıaqtalýyna baılanysty jalpy 812 915 IMEI-kod «qara tizimge» kóshirilip, olardyń jumysy buǵattaldy, - delingen mınıstrliktiń Kazinform agenttigine bergen jaýabynda.
Vedomstvonyń málimetinshe, bul kórsetkishter qabyldanǵan sharalardyń tıimdiligin jáne uıaly qurylǵylar naryǵynyń «kóleńkeden» shyǵyp, ashyq jumys isteýge kóshkenin naqty dáleldeıdi.
- Memleket tarapynan júrgizilip jatqan bul baqylaý tutynýshylardyń qaýipsizdigin qamtamasyz etip qana qoımaı, el ekonomıkasyna da oń áserin tıgizip jatyr, - dep atalyp ótken mınıstrlik aqparatynda.
Eske salaıyq, byltyr elimizde abonenttik qurylǵylardyń «aq», «sur» jáne «qara» tizimi paıda bolatyny týraly habarlaǵan bolatynbyz.
2025 jyly kúshine engen jańa talaptar boıynsha Qazaqstanǵa ákelingen barlyq mobıldi qurylǵy GSMA halyqaralyq bazasynda jáne memlekettik júıede mindetti verıfıkatsııadan ótýi tıis.