Smartfondardyń «sur» ımportynan Qazaqstan 100 mlrd teńgeden astam qarjy joǵaltty – mınıstr

ASTANA. KAZINFORM – Resmı saýda arnalaryn aınalyp ótý saldarynan smartfondardyń ımportynan Qazaqstan 100 mlrd teńgeden astam shyǵynǵa ushyrady. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev málim etti. 

– Biz baǵaǵa áser etpeımiz. Bul rette, resmı dılerler jáne dıstrıbıýtorlar «sur» naryqqa qarsy kúreste kómek surady. Olardyń pikirinshe, reforma smartfondar baǵasynyń ósýine ákelmeıdi. Óıtkeni bul zańdy naryqta saýda jasap júrgenderdiń ózderine tıimdi. Smartfondar ashyq túrde ımporttalǵandyqtan, olardyń kirisi artady, - dedi J. Mádıev Astana halyqaralyq forýmynda tilshiler suraǵyna jaýap bere otyryp.

Onyń sózine qaraǵanda, mınıstrliktiń taldaýyna sáıkes, reforma bastalǵanǵa deıin mobıldi qurylǵylardyń shamamen 75 paıyzy elge beıresmı túrde jetkizilgen. 

– Bul jaǵdaı el bıýdjetine 100 mlrd teńgeden astam qarajattyń túspeýine yqpal etti. Sondyqtan jaǵdaıdy túzetý qajet dep esepteımiz, - dedi mınıstr.

Eske salaıyq, jyl basynda elimizde abonenttik qurylǵylardyń «aq», «sur» jáne «qara» tizimi paıda bolatyny týraly habarlaǵan bolatynbyz. 

QR Tsıfrlyq damý, ınnovatsııalar jáne aeroǵarysh ónerkásibi mınıstrligi smartfondardy tirkeýdiń jańa erejesine qatysty túsinik berdi.