Smartfondardy tirkeýdiń jańa erejesi qurylǵylardyń qymbattaýyna áser ete me

ASTANA. KAZINFORM – QR Tsıfrlyq damý, ınnovatsııalar jáne aeroǵarysh ónerkásibi mınıstrligi smartfondardy tirkeýdiń jańa erejesine qatysty túsinik berdi.

- Jańa erejeler uıaly telefondardy zańsyz ákelýge jáne kóleńkeli naryqtyń úlesin azaıtýǵa baǵyttalǵan. Negizgi maqsat – tutynýshylardyń quqyǵyn qorǵaý, baılanys qurylǵylarynyń qaýipsizdigin arttyrý jáne alaıaqtyqpen kúresý, - delingen mınıstrliktiń Kazinform agenttigine bergen jaýabynda.

Vedomstvo aqparatyna qaraǵanda, bul sharalar azamattarǵa zańdy ári sapaly qurylǵylardy senimdi satyp alýǵa múmkindik beredi.

Sonymen qatar, bıznes úshin ashyq ári ádil básekelestik jaǵdaılary jasalyp, naryqtyń damýyna oń áser etedi. Al memleket zańsyz telefondardyń aınalymyn azaıtyp, ımportty baqylaýdy kúsheıtý arqyly alaıaqtyq deńgeıin tómendetedi.

Sonymen qatar Tsıfrlyq damý mınıstrligi «bul sheshim elimizde smartfondardyń kúrt qymbattaýyna ákelmeı me?» degen suraqqa jaýap berdi.

- Baǵaǵa keletin bolsaq, engizilgen jańa erejeler, joǵaryda atap ótkendeı, Qazaqstan aýmaǵyna kiretin abonenttik qurylǵylardyń zańsyz ákelinýi men taralýyna qarsy kúresýge baǵyttalǵan. Bul abonettik qurylǵylardyń qymbattaýyna áser etetin faktor sanalmaıdy, - dep jaýap berdi vedomstvo.

Eske salsaq, 2025 jylǵy 24 naýryzdan bastap abonenttik uıaly baılanys qurylǵylaryn tirkeý erejelerine engizilgen ózgerister kúshine enedi.

Jańa erejeler tek atalǵan merzimnen keıin elge ákelingen jańa qurylǵylarǵa ǵana qatysty.