Smartfondardy tirkeý erejesi ózgeredi

ASTANA. KAZINFORM – Elimizde abonenttik qurylǵylardyń «aq», «sur» jáne «qara» tizimi paıda bolady. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstrligi tirkelgen baılanys jobalaryn monıtorıngileý jáne damytý basqarmasynyń basshysy Azamat Seriktaev aıtty.

- Qabyldap jatqan erejege sáıkes, abonenttik qurylǵylardyń «aq», «sur» jáne «qara» tizimi paıda bolady. Erejeniń eń basty maqsaty – tutynýshylar men abonentterdi qaýipsiz jáne tekserilgen abonenttik qurylǵylarmen qamtamasyz etý. Eger qurylǵyńyz atalǵan ereje zańdy kúshine engenge deıin satyp alynǵan bolsa, eshqandaı qobaljýdyń, alańdaýdyń esh qajeti joq, - dedi Azamat Seriktaev.

Onyń atap ótýinshe, bul erejeniń osy jyldyń 24 naýryzyna deıin satyp alynǵan abonenttik uıaly baılanys qurylǵylaryna esh qatysy bolmaıdy. Atalǵan merzimge deıin satyp alynǵan uıaly baılanys qurylǵylardyń barlyǵy avtomatty túrde «aq» tizimge engiziledi.

- ıAǵnı, zańnyń keri kúshi joq. Ereje zańdy kúshine engennen keıin ǵana satyp alynǵan qurylǵylarǵa ǵana qatysty bolady, - dedi basqarma basshysy.

Azamat Seriktaevtyń sózine qaraǵanda, uıaly baılanys qurylǵylaryn tirkeý qaǵıdalaryna engiziletin ózgerister qurylǵylar baǵasyna áser etpeıdi.

Esterińizge sala keteıik, 2025 jylǵy 24 naýryzdan bastap abonenttik uıaly baılanys qurylǵylaryn tirkeý erejelerine engizilgen ózgerister kúshine enedi.

Osyǵan deıin Úkimet basshysy Oljas Bektenovtyń uıaly baılanys operatorlary arasynda básekelestik baıqalmaıtyny týraly aıtqanyn jazdyq.